قال عليا عصفورة.. إكرامي الشحات يهاجم مجدي طلبة

هاجم إكرامي الشحات، حارس مرمى الأهلي السابق، مجدي طلبة، نجم الكرة المصرية السابق، بسبب تصريحات الأخير ضده.

كان مجدي طلبة، قال في تصريحات تلفزيونية عبر فضائية تن: "الكابتن إكرامي، طلع من يومين قال عني كلام غلط، فهو قال في أحد البرامج التلفزيونية إني زملكاوي. إكرامي، قال أيضًا إنه كان متواجد في جلسة ثابت البطل معي من أجل تجديد عقدي مع الأهلي، وإني طلبت 75 ألف جنيه لتجديد عقدي مع الأهلي والكابتن ثابت عرض 50 ألف جنيه".

وأوضح: "الكابتن إكرامي، مكنش متواجد في تلك الجلسة وأنا مطلبتش 75 ألف جنيه لتجديد عقدي، في الوقت ده اتكتب في الجرائد مجدي طلبة، ساب النادي الأهلي عشان 25 ألف جنيه ، أنا دلوقتي عرفت مين العصفورة اللي طلعت قالت الكلام ده".

ورد إكرامي على تصريحات مجدي طلبة، حيث قال في تصريحات تلفزيونية عبر فضائية إم بي سي مصر: "في صديق عزيز بعتلي فيديو لأحد الأشخاص بيهاجمني وبيقول عليا عصفورة، لأني لما اتكلمت عن تجديد عقده مع الأهلي في وجود ثابت البطل، قولت أنه رفض التجديد".

وأضاف: "فوجئت بيقول في الفيديو إني مكنتش موجود في الجلسة، طيب إيه مفهوم العصفورة، إن لما تكون في أسرار داخل الغرف المغلقة العصفورة تطلع تقولها، طيب انت بتقول أنا مكنتش موجود في الجلسة، بتسميني عصفوره ليه".

وتابع: "أنت قولت مكنتش موجود في الجلسة والكلام ده كذب، موضحًا: «المعلومة خرجت، لأن إحنا كنا مسافرين واللعيبة سألت على الشخص ده، فالراحل ثابت البطل، خرج ووضح الأمور سواء للعيبة أو المدير الفني".

المصدر: صدى البلد