عايزة حق أخويا.. فتاة تتهم شاب سوري وآخرين بالتعدي على شقيقها بالشروق

تكثف الأجهزة الأمنية بمديرية أمن القاهرة من جهودها لكشف ملابسات اتهام فتاة لشاب سوري وآخرين بالتعدي على شقيقها في منطقة الشروق.

تلقت الأجهزة الأمنية بمديرية أمن القاهرة اخطارا من قسم شرطة الشروق تضمن ورود بلاغ من فتاة تدعى ن ح ادعت فيه تضررها من شاب سوري الجنسية وآخرين بالتعدي على شقيقها أثناء عودته من التمرين والتسبب في إصابته باشتباه في ارتجاج في المخ وجرح غائر.

وقالت الفتاة في تصريحات خاصة لـ صدى البلد «أنا كنت في شغلي وماما كلمتني قالت لي أن أخويا عصام راح التمرين ومش بيرد عليها، وقولت لها متقلقيش ممكن يكون مش شايفه بس أو حاجة، وبعدها جالي تليفون من المستشفى قالولي أخوكي عندنا وواخد 6 غرز في رأسه».

وتابعت الفتاة «روحت المستشفى وقالولي لازم جراحة تجميل عشان الجرح اللي في رأسه، وكان معاه 4 من أصحابه وبعدها روحنا مستشفى تاني وبات فيها، وروحت عشان أروح أصحاب أخويا لأن الوقت كان اتأخر».

أكملت الفتاة «وأنا في الطريق القسم كلمني وقولت لهم على واحد من المتهمين اللي هو ضربوا اصلا، وأديتهم أوصاف المتهم زي ما أصحاب أخويا قالوا، وبعدها اتقبض على المتهم ده وراح النيابة والاجراءات لسه شغالة وأنا عايزة حق أخويا».

حررت أجهزة أمن القاهرة المحضر رقم 3670 لسنة 2025 جنح الشروق، وتم اتخاذ الإجراءات القانونية اللازمة وإخطار النيابة العامة في القاهرة لمباشرة التحقيقات في الواقعة حيث طلبت الاستعلام عن حالة المجني عليه وكذا تحريات المباحث حول الواقعة.

ونشرت الفتاة عبر صفحتها بمنصة فيسبوك تفاصيل الواقعة حيث قالت «أخويا اتضرب واتهان وباسم القانون بطالب بحقه، أنا نوران، أخت عصام، ولد محترم ومتربي، اتعرض لاعتداء بالضرب الوحشي جوه الكومباوند اللي ساكن فيه، على إيد حوالي 10 أشخاص معاهم جنسية عربية، مش من الكمبوند ولا يعرفهم».

وتابعت الفتاة في منشورها «المتهمين اعتدوا عليه بطريقة بشعة، بالحزام، واتسببوا له في جرح عميق في رأسه وكدمات في جسمه كله، من بينهم شاب استخدم توكة الحزام في ضربه على دماغه مباشرة، وده اللي أدى للجرح العميق ده، ونتيجة الضرب العنيف، عصام دخل المستشفى وقعد ٣ أيام تحت الملاحظة، واتشخص بإصابة خطيرة وهي “ارتجاج في المخ”، وده بيدل على قسوة الاعتداء ووحشيته».

وأكملت الفتاة «توجهنا للنيابة فورًا، وعملنا محضر رسمي، وكل الإجراءات القانونية اتبعناها، الحمدلله مصر بلد قانون، فيها شرطة وجيش وقضاء محترم بيضمنوا العدالة لكل الناس، بكتب عشان أوصل صوتي وصوت أخويا، واللي حصله ميتسكتش عليه، وبطالب بأقصى عقوبة قانونية للمتهم الرئيسي واللي معاه».

طباعة شارك الشروق سوري مديرية أمن القاهرة اتهام فتاة لشاب القاهرة الجديدة

المصدر: صدى البلد