(زيارة جبريل ابراهيم للكويت)

دائما الحقيقة ما بنلقاها إلا في لحظات المواجهة و امبارح اتجلت الحقيقة قدامنا و سقطت العديد من الاقنعة و انفضحت الاكاذيب و الشائعات المنسوجة على السريع و ده الحصل امبارح بالليل في لقاءنا مع الدكتور جبريل ابراهيم وزير المالية و التخطيط الاستراتيجي في زيارته للكويت للمشاركة في الاجتماعات السنوية المشتركة للهيئات المالية العربية
زيارة جبريل للكويت جات في توقيت دقيق جداً و حملت في طياتها الكتير من الرسائل الاقتصادية و السياسية و قبل كل شئ كشفت عن الوجه الاخر و الوجه الحقيقي للوزير جبريل ، وجه الانسان الجميل المتواضع و العارف الحافظ لوحو و الحريص على بلده و المخلص لقضايا الشعب السوداني .

و قبل ما نتكلم عن الجانب ده خلوني اكلمكم عن الزيارة الرسمية قبل اللقاء الجماهيري ، فالوزير خلال مشاركته لاجتماعات الصناديق العربية قابل وزراء المالية و التجارة بالكويت و عدد كبير من مسؤلي الدول و المؤسسات و ناقش معاهم فرص التعاون و معالجة الديون و الاهم من كده إنو استعرض التعديلات القانونية القامت بيها الحكومة لتسهيل الاستثمار و جذب رؤوس الاموال .
اما الجانب الجميل من الزيارة ما كان في قاعات الاجتماعات او قدام عدسات المؤتمرات ، كان داخل مبنى السفارة السودانية النظمت لقاء تنويري للوزير مع رموز و قيادات العمل العام بالجالية و حقيقي كان لقاء استثنائي ما شعرنا فيهو ابدا باننا في قاعة اجتماعات مع اهم و اخطر وزير اتحادي بل شعرنا باننا في حوش سوداني كبير تحت شجرة في لقاء عائلة مع اخوهم الكبير ، كان لقاء بعيد عن اللقاءات الروتينية و امتد لساعات طويلة جدا لامن اشفقنا على الوزير الاستمع لينا باصغاء تااام و اجاب على كل تساؤل بصدر رحب و محبة عجيبة و بي لغة مفهومة للكل ، لغة رجل الشارع البسيط ما لغة الارقام الجافة .
اللقاء ده حقيقي كان كفيل جدا بانو ينسف الكتير من الانتقادات الموجهة لجبريل من غير معرفة و دون موضوعية ، و بكل تواضع الدنيا ظهر جبريل ابراهيم و اتحدث بكل وضوح و بشفافية تااامة و من غير اي تهرب من الاسئلة الكانت قوية و سخنة ، كانت اجاباته واضحة و شفافة و ابدا ما حاول انو يتوارى خلف العبارات الدبلوماسية ذي ما بيعملوا بقية الوزراء
صرح جبريل بقوة انو مافي زول تاني يفكر انو يحكم بي ضراعو و انو مافي زول عاقل بيناطح الجيش خاصة لامن الشعب يكون خلف الجيش و الاهم من كده اكد انو دعاة انفصال دارفور شرزمة ما عندها وجود او قيمة حقيقية .
تصريحات جبريل كانت كتيرة ما عايزين نحرق لناس التلفزيون الاخبار لكن تاكدوا بانو التاريخ سيحفظ لجبريل زيارته للكويت لانو ما جاء الكويت عشان يشحت او في سبيل المجاملة ، جبريل جاء رافع راسو و شايل معاهو ملفات من العيار التقيل و باذن الله نتائج الزيارة ح نشوفها على ارض الواقع .
اجمل ما في الزيارة انو الوزير اتحدث حديث العارفين بادق مشاكل المغتربين ، ذي التقول مغترب معانا و عايش ازمتنا ، ما اتكلم معانا كلام الناس القارية عن مشاكلنا بل كلام زول قاعد معانا بالجد و دي شهادة حية على انو القيادة ما موقع بل القيادة موقف ، امبارح في ناس كتيرة جدا جات اللقاء عشان تردم و تصفق للوزير لكن اندهشوا جدا و وجدوا انفسهم قدام شخصية جميلة جدا و عارفة بتعمل في شنو و إنو كل كلام الميديا كان مجرد شائعات و محاولات فاشلة للوقوف في وجه تحركات و قرارات المالية ، كل الناس لقت نفسها قدام وزير حقيقي عندو معرفة و رؤية و تخطيط استراتيجي حقيقي عشان كده القاعة التهبت بالتصفيق الحار و التكبيرات القوية .
شكرا الوزير جبريل نورت الكويت و شرفت الجالية السودانية و بانتظار تعليماتك بخصوص مشاكل الجوازات السودانية للجالية بالكويت .
نزار العقيلي

إنضم لقناة النيلين على واتساب

المصدر: موقع النيلين