مها أحمد تكشف تفاصيل أزمتها مع السقا وأمير كرارة: «مكنتش عارفة قوة السوشيال ميديا» (فيديو)

علقت الفنانة مها أحمد على أزمة غضبها من أحمد السقا و أمير كرارة أثناء عرض مسلسل نسل الأغراب قائلة: «الغضب مخسرنيش السقا وكرارة، ومقصدش أزعل أحمد وأمير، وساعتها مقللتش منهم، والسقا أخويا ولو شاف حاجة معجبتوش فيا بيقولي، لكني غلط إني عاتبت على السوشيال ميديا، أيامها مكنش عندي دراية بقوة وجبروت السوشيال ميديا وموضوع التريند، وكنت بعيدة عن السوشيال ميديا، ولما لقيت الناس عاملة أكونتات فيك قلت لا أعمل أكونت خاص ليا، وقلت أقعد افضفض مع نفسي عالسوشيال، نمت صحيت لقيت الدنيا مقلوبة عليا، واكتشفت إن في ناس في السوشيال بتكرهك أكتر ما بتحبك».

وقالت مها أحمد خلال استضافتها ببرنامج «أسرار» مع الإعلامية أميرة بدر، المذاع عبر فضائية «النهار»: «كبريائي بيقولي معملتش حاجة تستاهل أني أعتذر لكرارة والسقا، ومجدي عاتبني وقالي كنتي قلتيلي أو فضفضتي معايا الأول، وكان ممكن أشيل البوست اللي عملته لكن لقيت فيه توابع فيها تطاول، فقلت مش هشيله، كل الفنانيين كانوا محايدين حتى النقابة، في فنانات ومذيعات مرتزقة كتبوا شكر للسقا وكرارة، على أساس إني بنت البطة السودة، واللي فرق معايا 3 أشخاص، واحدة قعدت تشكر في المسلسل وبعدها كلمتني، والتانية معروف أنها صاحبتي وفجأة لقيتها كاتبة بوست طويل عريض بتشكر في تربيتهم، والناس في الكومنتات بتقولها طب وصاحبتك؟، وأنا معاتبش حد بالعكس هسيبه على عماه».

ورفضت مها أحمد ذكر اسم فنان زميل لها استهزأ بها أثناء طلبها دور في أحد أعماله قائلة: «معنديش الجرأة أذكر اسم الزميل اللي قالي هتشحتي دور لأنه ما يستاهلش، وكان أكتر واحد بيتنا مفتوح له وبياكل معانا عيش وملح، وكان بيعمل فيلم قلته ايه يا ابني الأقربون أولى بالمعروف، قالي هو انتي هتربطي على عينك وتشحتي، هو الجري على أكل العيش غلط أو شحاتة؟».

مها أحمد: معنديش مشكلة أشارك في أعمال خليجية

وتابعت: «السعودية موضوع مش جديد، ومن زمان من أيام المسرح والنجوم الكبار زي الأساتذة عادل إمام وسعيد صالح وسمير غانم بيشاركوا في حاجات زي كدة، ده الزعيم كان بيلف العالم وكان استقباله استقبال رؤساء، ومعنديش مشكلة أشارك في أعمال خليجية، لأني بمثل بلدي، وبلدي أم الفنون وكل اللي عايز يتشهر بيجي عندنا».

اقرأ أيضاًالانتخابات الرئاسية.. مجدي كامل ومها أحمد في مركز شباب الشيخ زايد «صور»

مروة صبري تهاجم مها أحمد بسبب الشحاتة لايف: أنتي بتمسحي تاريخك بـ«أستيكة» (فيديو)

بعد خناقه التيك توك.. إنذار رسمي لنقيب الممثلين بتحاليل مخدرات لـ مها أحمد وفادي خفاجة

المصدر: الأسبوع