(ولا تبرجن تبرج الجاهلية الأولى)

يا جماعة شنو حكاية انو الواحدة تفتح فيديو قدام مرايا وتشغل غنية وتقعد تغني وتنشرها في (الاستوري) ولا في (التيك توك) !؟
– معقولة بقينا نقع ضحايا سريع كدا لترندات مواقع التواصل الاجتماعي!؟
– الواحدة تعرفها زولة متدينة وما تكاد تنشر ليها صورة ولو نشرت صورة تلقاها صورة واحدة رسمية صورة حساب
فجأة تلقاها فكت العرش وبقت كل يوم تنشر فيديو فيهو صورتها قدام دولاب وهي في كامل زينتها.

.!
– ياجماعة لازم نصحى شويا .. كدا ما ينفع… الحياء زينة المرأة .. قبل تلاتة أربعة سنوات كان الواحد عشان يشوف ليهو واحدة الا يجي البيت ويتقدم ح يشوفها هسي بقى الواحد يخش صفحتها في التلغرام يلقى ليها مية صورة ومية فيديو
يا جماعة المجتمعات تُمسخ هكذا .. شويا شويا .. شويا شويا تتساقط القيم لازم نذكر بعض
كلنا ذوو خطأ … لكن واجب علينا نذكر بعض
وأنتم تقرأون في القرآن الكريم أن الله تعالى عاب على علماء وعباد بني اسراءيل سكوتهم عن المنكر
(لولا ينهاهم الربانيون والأحبار عن قولهم الإثم وأكلهم السحت لبئس ما كانو يصنعون)
– وأغرب من ذلك النسوان المتزوجات .. الواحدة تلقاها متزوجة وبتعرض في جسمها للغاشي والماشي.. وبعد شويا تجيك في استشارة طلاق انو طلقها عشان بتنشر فيديوهات.
ونصيحة للشباب:
من البداية خليك واضح في الاختيار .. أنت ما زول تصوير وحفلات ونشر صور = إياك تعرس واحدة بتنشر صورها وفيديوهاتها وتقول بصلحها وبعدين تجي تجقلب
ما بتتصلح.. دي بني آدم ما طلب فول عشان تصلحو..!
دي ما حاجات فيها هظار
داير مرة ما بتنشر فيديوها وصور من البداية حدد هدفك واختاره بوضوح
– كلامي ده موجه للبنات المسلمات المعظمات للشرع والكانوا أصلا ما بينشروا صور من تلاتة اربعة سنة
– أرجو انو المنشور ده يكون بمثابة تنبيه وتصحيح مسار والناس تعود إلى الالتزام بالضوابط الشرعية للباس المرأة.

إيهاب إبراهيم الجعلي

إنضم لقناة النيلين على واتساب

المصدر: موقع النيلين