مؤلفة مسلسل «وبقينا اتنين»: نرصد روح وأفكار ونفسية الزوجين بعد الانفصال

حمَّست الكاتبة أماني التونسي، جمهورها لمسلسلها الجديد «وبقينا اتنين» بطولة الثنائي شريف منير ورانيا يوسف، قبل أيام من عرضه عبر قناة «أون» بداية من 2 ديسمبر المُقبل.

وكتبت التونسي، عبر حسابها الشخصي على موقع التواصل الاجتماعي فيس بوك، قائلة: «من المسلسلات الغالية جدًا على قلبي، المسلسل بيتكلم عن صدمة ما بعد الانفصال، بس مش أي انفصال ولا أي طلاق.

. لا ده انفصال وأنت بتحب الطرف التاني، عادي تنفصل عن حد بتحبه وكان شريك حياتك، بس لما تكتشف إن ده مكانش حب وأنك كنت شايفه بعيون قلبك اللي دايمًا بتبقى بتحكم غلط، لأن كل طرف بيحب التاني بطريقته».

وأضافت مؤلفة مسلسل وبقينا اتنين: «يعني طرف بيدي للطرف التاني اللي العطاء خلاه أناني اتعود ياخد وبس بعد ما كان بيدي في الأول لغاية ما خلاص بقى الطرف التاني مضمون، وأكبر ضمان هو الجواز اللي بيخلي كل طرف فاكر إن التاني بقى ملكه ومش محتاج أي مجهود أنه يحافظ على العلاقة وخصوصًا لو في أولاد، كل واحد بيحب التاني بطريقته».

وتابعت «دي أكبر مشكلة لو أنت بتتحب بالطريقة اللي مش بترضيك ومش بتكفيك من هنا بتبدأ الخطوات السريعة، أو البطيئة للانفصال، وهنا بقى السرعة والبطيء بتعتمد على دفع كل طرف في العلاقة، لإنهاء العلاقة اللي بتستنزف كتير أوي من روحك».

وأردفت «وكان هنا دور الجلسات النفسية لترميم أو إنهاء العلاقة، وده من أكتر الأجزاء اللي بحبها بسبب دراستي اللي فادتني في المنطقة دي في المسلسل، وهو أنك بتناقش روح وأفكار ونفسية كل طرف وبتشوف كل واحد شايف  التاني إزاي.. أتمنى أنه يعجبكم وأنه يبقى إضافة لأعمالي اللي هسيبها في الدنيا من بعدي».

أبطال وأحداث مسلسل وبقينا اتنين

وتدور أحداث مسلسل «وبقينا اتنين» حول العلاقات الأسرية والزواج، ويتطرق إلى صدمة ما بعد الطلاق، وما يتعرض له شركاء الحياة بعد الانفصال من صدمات ومراحل نفسية ومواقف اجتماعية وحياتية تؤثر عليهم.

مسلسل «وبقينا اتنين» بطولة شريف منير، رانيا يوسف، ميمي جمال، يوسف عثمان، طارق عبدالعزيز، تامر فرج، مروة عبدالمنعم، عزة لبيب، ياسر الطوبجي، نانسي هلال، عزت زين، نبيل علي ماهر، وعدد آخر من الفنانين، ومن تأليف أماني التونسي وإخراج طارق رفعت، وإنتاج كريم أبو ذكري.

 

المصدر: الوطن