البوسوس منو للبرهان؟

بما إنو البرهان ده هو قائد الجيش ورئيس مجلس السيادة في السودان معناها هو الكل في الكل حاليا، وماف مسؤول يكون الكل في الكل وما يكون حولو مجموعة من المنظراتية والوسواسين والمطبلاتية وغيرهم من الشلل المعروفة.

لو رجعنا للبداية هو أصلا البرهان لقى فجأة نفسو هو رئيس المجلس العسكري وتاني بقى رئيس مجلس السيادة، بجانب منصبو كقائد عام للقوات المسلحة، يعني الوسواسين حيكونو متنقلين معاهو في الفترة دي كلها، منهم من استمر ومنهم من سقط.

متخيلين حميدتي ذاتو كان بوسوس للبرهان ووزاهو يتخذ قرارات كتيرة خطأ زمان، طيب باقي الموسوسين منو؟ واصلو الرئيس بكون حولو في منو؟

الوسوسة ممكن تجي من الأهل لأنو ديل اقرب ناس مع المسؤول في البيت، وممكن من ناس المكتب في الشغل.

الوسواسين ممكن يكونو من الاصحاب، آي اصحابك انت يا البرهان، ومن المستشارين الحولك، ومن السفراء والأجانب البتقابلهم.

الوسوسة ممن تجي للبرهان من الاعلام البشوفو هو براااهو، ومن الإعلاميين المناصرين أو عاملين فيها مناصرين للجيش.

بهمني نقول للبرهان الفات مات، كان قلنا نحميك من الوسوسة ما بنقدر، لكن وسوسة فارغة اسمعها باضان وطلعها باضان تانية، عندنا هدف واحد بس حاليا تنتهي لينا من آل دقلو ديل، تعمل أي اتفاق يكونو فيهو لقدام معناها دقست عديل كده، وانت فاهم دقسة العسكري يعني شنو، الشعب دا عانى ما عانى أسوأ يمكن يحصل ليهو أهو حصل خلاص، يبقى ماف حل غير بديت راجل وضكران تستمر كده، قائد لكل الشعب السوداني.

محمد آدم

المصدر: موقع النيلين