«كيس حميد على البنكرياس».. تفاصيل الحالة الصحية لـ أنغام بعد سفرها

ما زالت الحالة الصحية للفنانة أنغام، تستحوذ على اهتمام قطاع كبير من الجمهور عبر منصات التواصل الاجتماعي خلال الأيام الماضية، وبالتحديد مع سفرها للخارج للعلاج، ودخولها المستشفى، لذا ارتفع البحث حول تفاصيل الحالة الصحية لـ «أنغام».

وفي هذا السياق، خرج الإعلامي محمود سعد، في بث مباشر عبر حسابه الرسمي بموقع التواصل الاجتماعي «فيسبوك»، مشيرًا إلى أن أنغام كانت تعاني من وجود كيس حميد على البنكرياس، الأمر الذي استدعى سفرها إلى ألمانيا، لتخضع إلى جراحة عاجلة لاستئصاله.

وأضاف محمود سعد: «من حسن حظي أنه صارت بيني وبين أنغام صداقة في منتهى القوة ومحبة كبيرة.. وبعت لها رسائل من فترة مش بترد وده مش من عادتها، لأنها على طول بترد عليا، والنهارده الصبح ظهرت وكلمتني».

كما تابع محمود سعد: «طبعًا السوشيال ميديا مليانة أخبار هنا وهنا، والبعض بيجتهد في الأخبار وإحنا عارفين مزايا السوشيال ميديا وعيوبها، ولقتها قلقانة جدًا عليكم، قالت لي أنا قلقانة جدًا على الناس اللي بتسأل عني، والأخبار اللي بتتقال عني غير دقيقة».

وأضاف: «أنغام عندها كيس على البنكرياس، والحمد لله طلع حاجة عادية وحميدة، وكل اللي بيتقال مالوش أساس من الصحة خالص، وعملوا ليها منظار في المانيا وبالتحديد في ميونخ».

وتابع: «المنظار دخل من الفم، لحد ما وصل البنكرياس وشال جزء كبير من الكيس لأن الكيس كبير، وهي بتاكل، وبتتألم جامد جدًا وعاوز أنك تدعوا لها، بتقدر تمشي وتاكل حاجات بسيطة، معندهاش أي حاجة خبيثة، وهتخرج بكره أو بعده».

كما أشار الإعلامي محمود سعد، إلى موعد عودتها لمصر، قائلا: «لو خدت حقن في الدم هتضطر تقعد شوية، ولو حبوب احتمال تيجي على طول، واللي فاضل من الكيس مش مزعج، قد تحتاج تشيله في فترة من الفترات قدام، وعاوز متابعة، كل شهر أو اتنين تعمل رسم وتشوف».

وتابع: «الأطباء في ألمانيا قالوا ليها اعملي رسم في مصر، ولو مستقر ومش بيكبر مفيش مشكلة، ومفيش حاجة خطر، وهي كويسة جدًا، واتكلمنا أكتر من تلات أربع مرات، أرجوكم ده الخبر الدقيق».

اقرأ أيضا:

تامر حسني في المركز الثالث.. عمرو دياب الأعلى استماعا على أنغامي بعد «ابتدينا»

فحوصات على البنكرياس.. أنغام تنشر صورة لها من المستشفى وقلق واسع بين جمهورها

رقصة على أنغام «خطفوني».. فيديو تامر حبيب وإنجي علي يشعل السوشيال ميديا

المصدر: الأسبوع