داليا الياس: من أكتر الحاجات البتمني نتعلمها من المصريين (..)

من أكتر الحاجات البتمني نتعلمها من المصريين أثناء وجودنا القسري بيناتهم وتغيِّر سلوكنا المعتاد وتنفعنا بعد العودة بإذن الله…فن التسويق والمبيعات!!

يعني في مصر دي ذاتا مثلاً… تخش المحل السوداني تلقي البائع قاعد ورافع رجلينه في الكرسي…لحدي مايتنفض ويتمغا ويتجرجر ويجي يبايعك بدون نفس تكون زهجتا وندمتا علي دخلتك عنده ونسيت ذاتك داير تشترى شنو!!! علماً بأن أسعار المنتجات السودانية في السماء بدون مبرر واضح!!

وممكن عادي يخليك مشحوط ويرد علي التلفون، ويطلع ينادي زول من برة، ويدخل الحمام لو لزم الأمر وبعد داك يجيك!!
بينما المصريين يشيلوك من الأرض شيل… يستقبلوك من الباب… ويوصلوك الباب.

. ويحسسوك إنك ملياردير وباشا بجد… وممكن ينزل ليك المحل كله… ولو غرضك ما متوفر يقنعك تشتري غيره حتي لو ما محتاج ليه وإنت تتكشم براك وبكل أريحية!!

وماتقولوا لي عشان الإكرامية… لأننا بندفعها مبسوطين… وبنشتري بيها خدمة محترمة وتقدير واضح بغض النظر عن حقيقته من عدمها!!
بعض الباعة السودانيين لو إتقطَّع في فن التسويق تلقاه خاتي كرسي قدام المحل يبحلق في الحريم ويكورك ليك من محله : ( تعالي علينا جاي… خشي لي جوة)!!

هسه أنا أحدثكم من قلب الحدث…لطعوني ساعة في المحل وكل واحد عامل مشغول وناسين إنه شغلتهم دي كلها هدفها الأساسي الزبون… وأهو… مشيت خليت غرضي… وما ناوية أرجع تاني لأنها تاني مرة… أظن البياعين ديل قحاطة وقاصدني ????
يلا… خسروا طلتي البهية المساكين ????
د(اليا) س

إنضم لقناة النيلين على واتساب

المصدر: موقع النيلين