مؤسس «أمهات مصر» تعرض أفضل طرق المذاكرة للأبناء في شهر رمضان

قالت عبير أحمد، مؤسس اتحاد أمهات مصر وائتلاف أولياء الأمور، في منشور عبر صفحتها على فيسبوك، إن تنظيم الوقت في شهر رمضان ما بين العبادة ومشاهدة المسلسلات وبين المذاكرة، أمر مهم، بالنسبة لطلاب جميع المراحل التعليمية، ولا بد وأن يضع أولياء الأمور جدولاً مناسبًا لأبنائهم، حتى لا يضيع الوقت.

وتفاعل العشرات من أولياء الأمور على صفحة اتحاد أمهات مصر للنهوض بالتعليم، وائتلاف أولياء الأمور، حيث قالت ولي أمر: «كل سنة وانتم طيبين ودايمًا يا رب الفرحة والسلام لينا كلنا، رمضان كريم، المذاكرة طبعًا بعد الفطار لأن النهار كله للمدرسة والدروس اللي طبعًا كلها هتبقى قبل الفطار، هنلحق ساعتين تلاتة قبل النوم نذاكر فيهم عشان كمان امتحانات الشهر».

وأضافت ولي أمر أخرى: «أعتقد أفضل وقت للمذاكرة قبل الفطار، الأولاد ينجزوا المهام المطلوبة منهم، لأن بعد المغرب التليفزيون بيسرق وقتهم».

وقالت أخرى: «أفضل وقت للمذاكرة قبل الفطار بساعتين يكونوا الولاد نامو شوية بعد رجوعهم من المدرسة».

وتابعت ولي أمر أخرى: «مدرسة ابني ملتزمة جدًّا، ولازم الأولاد تروح كل يوم، والمديرة بتعمل مسابقة لأفضل فصل فيه أقل نسبة غياب، وده بيحفز كل الطلاب على عدم الغياب، بنرجع من المدرسة بنيِّم الولد لحد أذان المغرب وبعد الفطار بنصف ساعة بنذاكر لحد عشرة بالليل».

وأضافت ولي أمر أخرى: «رمضان صعب التنظيم فيه أوي، بس بحاول أعمل تارجت يخلص أسبوعيًّا بحيث إن آخر الأسبوع نشوف خلص إيه وناقص إيه، وأكيد بيقع حاجات بس بنحاول».

واستكملت ولي أمر: «طبعًا في رمضان الوقت بيجري بسرعة، والمذاكرة هتكون صعبة وإحنا صايمين، هنحاول نذاكر الصبح قبل الإفطار ونشاهد قنوات مدرستنا للاستفادة منها لأن وقت رمضان قصير جدًّا، ربنا معاكم ومعنا جميعًا، وخصوصًا الشهادات، لأن المنهج كبير ووقت رمضان قصير، وبعد رمضان هاندخل على الامتحانات، ربنا ييسر للجميع يا رب».

وذكرت ولي أمر أخرى: «كل عام وانتم بخير وسعادة، أعاده الله عليكم بالخير واليُمن والبركات.. أعتقد أن أفضل طريقة للمذاكرة بعد صلاة التراويح الولاد تصلي وتبدأ تذاكر عن طريق تدوين المعلومات ومحاولة سماع الشرح وحل الأسئلة على كل درس أول بأول منعًا للتراكم وربنا معاهم ويوفقهم، وكل عام وجميعنا بألف خير وسعادة».

المصدر: الأسبوع