النچر ..

بقلم: اياد السماوي ..

شوفوا عاقبة النچر شلون عاقبة طايحظها ، وياريتها انتهت عند هذا الحد ، ما يدري الأغبر شنو من بلاوي جاية عليه .. أنا اليوم أريد أهرّب الأسئلة .. حتى هم أطرگ بطنه وهم اطرگ بطون ربعه الي بعدهم لهسه مصدگين راح يرجع ومحد راح يحاسبه .. النچر چان مخوّف الدنيا كلها بكذبة ، مفاد هاي الكذبة أنّ القضاء العراقي بأمرته وأنّ رئيس مجلس القضاء الأعلى محبس بأيده شيريد منّه ينفذله وما يردله طلب ، احبس فلان يحبسه ، صّدر أمر قبض بحق فلان يصدّر ، وهذولة ربعه مو كلهم حرامية فمصدگين بهاي الكذبة ومخليهم كلهم يتراجفون وماخذلك بوشهم كلهم .

. تالي ما تالي إجاه البوري المعدّل من القضاء طشّر مخه ومخ الخلفه ..
النچر .. ما جاي يستوعب أنّ السجن سيكون بيته ، وأنّ الدنيا قد أدارت ظهرها له ، ملتهي يسوي بطولات وخطب فارغة ، وكل عقله الجماعة الي دگوله صدر عياله راح يخلصوه ويمنعون عنه الملاحقات ، ما يدري اثخن واحد بيهم يا دوب بس يبعد الشبهات عن نفسه .. وما يدري قائمة تقدم ما راح تشارك بالانتخابات وراح تشطب من المشاركة ، وهاي الصور الي تارسه الشوارع راح ترّفع وتنشال كلها ، لأن قبل أيام من صدر قرار اجتثاث محافظ الموصل ، المفوضية العليا المستقلة للانتخابات أصدرت قرار برفع كل صوره من الدعاية الانتخابية للكتلة مالته ، مع العلم الرجل محافظ الموصل لا مدان بتزوير ولا حنث باليمين ولا انتهاك للدستور ، والقائمة الي يدان رئيسها بالتزوير تمنع من المشاركة بالانتخابات ، مثل قضية مشعان الجبوري مو شطبت المفوضية القائمة مالته لما ادانته المحكمة الاتحادية بالتزوير ، خو القانون ما مصمم بس على نجم الجبوري ومشعان الجبوري ؟؟ ..
النچر .. يريد يسوي تجمع باچر الجمعة العصر بقضاء الخالدية ، وجامع بيه كل البعثيين ربع أبوه ويريد يبيع بهلوانيات وبطولات ويتقمص دور ( الشهيد صدام ) ويعيد أمجاد المقبور .. النچر بعده لهسه ما مصدگ قضيته بايگه هوا ، وما يدري فلان وعلان كل همهم الآن يبعدون الشبهات عنهم وما راح يگدرون يفكون حلوگهم أمام هذا الطوفان العظيم .. النچر ما جاي يصدّگ الحبل جاي يلتف على رگبته ونهايته صارت قريبة جدا ..
أياد السماوي
في ٣٠ / ١١ / ٢٠٢٣

المصدر: شبكة انباء العراق