الجيش كلامه واضح هو مع الميليشيا لحدي أم دافوق وداراندوكا

الجيش ده كلامو واضح هو مع الميليشيا دي لحدي أم دافوق وداراندوكا
و الجيش ده بعد معارك شمال ووسط السودان عرفنا يقينا انو شغال بسياسة النفس الطويل وسياسة كسب الحرب ككل لا كسب معارك جزئية قد تسبب له الخسارة الكلية في الحرب
الجيش الآن شغال شغل شديد وشغل تقيل في مناطق كرفان من الناحية الشمالية الشرقية و الجنوبية الشرقية و شغال شغل تقيل في صالحة وده ليه؟

عشان يأمن خطوط دفاعه الشرقية كلها عند انطلاقه لدارفور
يعني إذا أمن الخرطوم و النيل الأبيض ثم كرفان شمالها وجنوبها
كده حيكون الانطلاق إلى غرب كردفان بابنوسة و الفولة ثم الضعين و زالنجي و الجنينة ونيالا دي كلها حتكون في الطبلون
ده غير المتحركات الموجودة في مالحة و الجايه من الدبة
ياخي دي حتكون قرابة المائة متحرك
ومع ذلك حيكون ضهرها مؤمن تماما بإذن الله تعالى

نعم الثمن غالي جدا وكل يوم بنفقد أرواح بالعشرات،لكن ليقضي الله أمرا كان مفعولا
الميليشيا تدرك تماما انو في إعصار جاي عليها جاي عليها بإذن الله تعالى عشان كده بتحاول تستفز الجيش وتستعجلو بمجازر و ضغط شعبي و كلام زي ده
لكن جيشنا واعي وناسنا الفي الميدان واعين وعارفين الحاصل شنو تماما
الموضوع ده أنت بتشوف صعب وبعيد وهو فعلا صعب وصعب جدا كمان
والله يا اخوانا انا مرات بفتح خريطة السوادن وبقعد أحلل براي مجريات المعركة بجيني صداع
فكيف بمن يديرها و كيف بمن يقاتل فيها عديل
كثفوا الدعوات واجتهدوا فيها

و أي زول يشوف ممكن يخدم الجيش كيف ويخدم إعلاميا ماديا جسديا بكل ما أوتيت
و لا تلتفتوا للمرجفين و المخذلين و المخونين و العملاء و المرتزقة المأجورين
واجعلوا ثقتكم في الله عظيمة ثم اجعلوا ثقتكم عالية في جيشكم وقياداتكم
نصر من الله وفتح قريب

مصطفى ميرغني

إنضم لقناة النيلين على واتساب
.

المصدر: موقع النيلين