المتهم الثالث بواقعة مطاردة فتيات الواحات: معرفش البنات و معملتش حاجة
تاريخ النشر: 17th, August 2025 GMT
حصل موقع صدى البلد على نص اعترافات المتهم مازن طالب بكلية الطب جامعة القاهرة، حوال اتهامه بمطاردة فتيات الواحات والتسبب في اصطدام سيارتهم بسيارة نقل.
وأدلى المتهم بواقعة مطاردة فتيات الواحات، باعترافات تفصيلية حيث أنكر اشتراكه مع آخرين في مضايقة الفتيات والتسبب في قيامهم بالاصطدام بسيارة نقل مما أحدث إصاباتهم، وأنه يمتلك ترخيص للسيارة وقام بتسليمه فور القبض عليه.
وقال المتهم بواقعة مطاردة فتيات الواحات، اللي حصل إني كنت مع واحد صاحبي روحنا نشرب حاجة في البنزينة وأول ما وصلنا لقيت شباب عايزة تطلع بعربياتها من البارك بتاع البنزينة وبيشاورلي أحرك عربيتي عشان قافل عليهم قولت لصاحبي تعالى تمشي الدنيا مش حلوة أصلا.
وتابع المتهم فعلا مكملناش دقيقتين واتحركت بالعربية وكذا واحد من الشباب مشيوا وكنت مروح بيتي في حدائق أكتوبر وأنا سايق كان على يميني وشمال عربيات تانية وعلى طريق الواحات شوفت عربية البنات كانوا ماشين معانا على الطريق.
استكمل المتهم الطريق كان فاضي والدنيا كانت هادية، وأنا كنت ماشي على سرعة 80 كم/س، وكنت ماشي أقصى الشمال وهما في الحارة في النص وكنت بحاول أدخل يمين عشان الطريق كان في إصلاحات وتقريبا البنات مكنوش مركزين فمعرفتش أدخل منهم وكانوا قافلين عليا.
أضاف المتهم روحت هديت سرعة العربية وعديت من ورا عربيتهم ومسكت أقصى اليمين ومشيت بسرعة وعديتهم وروحت على البيت، ومخدتش بالي أنا كنت سايق ومش مركز معاهم، وأصلا معرفش ولا واحدة فيهم، ومفيش بيني وبينهم أي علاقة، مؤكدا مكنش قصدي أزنق عليهم وهما ماشيين وكلام البنات ده ممكن يكون عشان يطلعوا تريند ويتشهروا.
قال المتهم مهند 24 سنة طالب بكلية الهنسة، أنه لم يقوم بالتعرض للمجني عليهم فتيات الواحات، أو ملاحقتهم وتتبعهم والتسبب خطأ في إصابتهم بأن قاموا بمضايقتهم هو وآخرين على الطريق، نافيا قيامه بقيادة مركبة على الطريق بطريقة ينجم عنها الخطر.
وقال المتهم بمطاردة فتيات الواحات، اللي حصل إني طالب بكلية الهندسة جامعة نوال الدجوي، وكنت نازل رايح الجامعة عادي كلمت صاحبي نتقابل برا قولت نروح نقعد في الكافيه لحد ميعاد الجامعة وقابلت واحد صاحبي عنها وطلعنا قعدنا في البنزينة وكانت الساعة 5.50 الصبح.
تابع المتهم فضلنا قاعدين لحد 6.10 الصبح وبعدين وأحنا بتركب العربية شوفت 3 بنات لابسين لبس مش كويس وبيركبوا عربيتهم عادي وأحنا طالعين بقولهم جايين في سباق نشد سوا بالعربيات، راحوا ضحكوا بس محدش اتسابق ولا حاجة.
استكمل المتهم بواقعة مطاردة فتيات الواحات، كملت طريقي وأنا راجع وكنت وراهم ومرة واحدة لقيت العربية خبطت في عربية نقل كانت راكنة على الشمال ركنت عربيتي ونزلت بسرعة اطمن عليهم وساعدتهم وخرجت واحدة منهم من العربية واطمنت عليهم وبعدين روحت الجامعة وبعدها اتقبض عليا.
فيما أدلى المتهم الأول عبد الرحمن . ج 18 سنة، طالب بكلية اقتصاد وعلوم سياسية، باعترافات تفصيلية حول الواقعة، وأنكر اشتراكه مع آخرين معلومين بالتعرض للمجنى عليهم كلا من "رنا . ا " و "نزال . ي" وكان ذلك بالطريق العام بأن ارتكبتم أمورا وإيحاءات وتلميحات جنسية، وذلك حول كونكم 4 أشخاص وقمتم بتكرار تلك الأفعال من خلال ملاحقة وتتبع المجنى عليهم.
وتابع المتهم بحادث مطاردة فتيات الواحات اللى حصل ان انا كنت نازل مع مازن متفقين ان احنا هنروح يوم الأربع ندفع فلوس كلية الشرطة وروحنا الصبح على بنزينة شيل اوت اللى في طريق المحور وقولنا هنقعد هناك شوية نشرب قهوة وبعدها نتحرك ولما دخلنا البنزينة، كانت زحمة اوى مكنش في مكان نركن فيه فا راح مازن قافل بعربيه على عربية من العربيات اللى راكنة وقال للناس هناك ان لو حد حب يطلع العربية بتاعتوا هو قاعد في سيركل كيه وبعدين قعدنا.
وأضاف المتهم بحادث مطاردة فتيات الواحات، بعد 5 دقايق في حد جه من الشباب الى كانت واقفة وقلنا ان هو عايز يطلع من الركنة ساعتها مازن قال خلاص احنا نتحرك للبيت واجيب فلوسي وبعدين نروح كلية الشرطة عشان ندفع الفلوس فا طلعنا ركبنا العربية وبعدها طلعنا لطريق بيت مازن، وخدنا طريق الواحات وكان في عربية بي ام وعربية جيلي وعربية افيو ماشيين جنبنا وكانت كل شوية العربية الافيو عماله ترمى علينا فا حبينا نطلع منها.
استكمل المتهم بواقعة فتيات الواحات مازن طلع قدام كدا وكان في عربية نقل واقفة مازن صحبي طلع منها وسمعنا بعدها صوت عربية بتخبط في العربية النقل وبعدها مشينا روحنا على البيت عشان ناخد الفلوس لكلية الشرطة وقعدنا شوية وبعدها دفعنا الفلوس وعلى الساعة 11 بليل في واحد كلم قريب مازن وقالوا ان هو معاون مباحث قسم ثالث وان هو عايز مازن فا انا روحت معاه عادى وبعدها طلب العربية بتاعة مازن فرجعنا جيبناها وروحنا على القسم وهناك لاقيتهم بيسالو مازن بيقولو مين كان معاك قالهم عبد الرحمن راحوا خادونى وخلونى في القسم وجيت النيابة النهارده وبس دا كل اللى حصل.
المصدر: صدى البلد
كلمات دلالية: فتيات الواحات مطاردة فتيات الواحات واقعة مطاردة فتيات الواحات الواحات اعترافات بواقعة مطاردة فتیات الواحات المتهم بواقعة على الطریق طالب بکلیة
إقرأ أيضاً:
حاصرونا بـ3 عربيات وطلبوا منا نركن علشان نقعد معاهم..نص التحقيق بواقعة فتيات طريق الواحات
حصل اليوم السابع على نسخة من نص تحقيقات نيابة أول وثالث أكتوبر، في القضية المعروفة إعلاميا بـ"حادث مطاردة طريق الواحات" والمتهم فيها 4 شباب بمطاردة سيارة يستقلها 3 فتيات على طريق الواحات وتسببوا عقب إغلاق الطريق بالاصدام في سيارة مقطورة الأمر الذى تسبب في إصابتهن بجروح في مختلف أنحاء جسدهن.
بدأت التحقيقات مع المجنى عليها الأولى "رنا . ا . ف" 26 سنة، وتم سؤالها بالآتى:
س ما تفصيلات شكواكم
ج: انا كنت في البيت كلمت "انزال" صحبتى عشان انا حفلة تخرجي يوم 21 أغسطس 2025 المقبل، وكنت عاوزة انزل اشتري حاجات للتخرج فكلمتها امبارح الصبح 13 أغسطس 2025 ، قولتلها تعالي ننزل نشرب حاجة وبعدين نروح نشتري الحاجات، نزلنا روحنا الحي الأول عشان كنت هنزل اشتري فستان من الحصري، قعدنا في إحدى محطات البنزين في الحي الأول وقعدنا في كافيه داخل البنزينة، وشرينا قهوة ، فكان في شوية شباب قاعدين على ترابيزة بره واحنا دخلنا وقعدنا جوه على البار، وطلبنا حاجة نشربها ،والبار قدامه بيبص على المكان اللي الشباب قاعدين فيه فاضطرينا نقوم من على البار عشان منكنش في وش الشباب لاقتهم قاموا وغيروا المكان وجم قعدوا في وشنا تاني فانا نزلت الستارة اللي تمنع انهم يشوفونا
مدير الكافيه قال انهم عايزين ينضفو المكان فعمال النظافة خرجونا بره عشان ينظفوا المكان فخرجنا وقعدنا على ترابيزة بعيدة عن الشباب، قعدنا شوية وبعدين قولتلهم يالا بينا نمشي وركبنا العربية واتحركنا، لاقيت الشباب ركبوا عربيهم واتحركوا ورانا في 3 عربيات خرجوا ورانا على الطريق وفضلوا يرخموا علينا بعربياتهم على الطريق ، واحد فيهم راكب عربية بي ام زنق عليا في الطريق جامد ومشى قدامي والعربية الثانية نوعها كيا كنت على يميني والعربية الثالثة نوعها جيلي كانت على شمالي وكانوا الثلاث عربيات محاصرنا من كل اتجاه وبعدين بدأ اللي في العربية البي ام يقولي انزلي بقولك انزلي طيب اركني نشرب حاجة في مكان هقولك على حاجة، وكل ماجي اطلع منه يجي قدامي معرفش، بعد كده كان في مطب ولمحت حاجة في أيده معرفش بالظبط ايه اللي كان معاه وفضل يقولي اقفى ، وبدأوا يزنقوا جامد عليا كل ما احاول اطلع منهم يزنقوا عليا أكثر واللي كان في العربية الكيا كان يقولي مش هتعرفي تطلعي منا كل ما اسرع يسرعوا معايا كل ما ابطا يبطئوا معايا ، كان في عربية نقل من الكبيرة كانت راكنة على الشمال وانا بحاول اخرج منهم ومكنتش واخدة بالي ان العربية النقل واقفة ، كان كل همي اخرج منهم سرعت جامد عشان احاول اخرج منهم روحت داخلة في العربية النقل الواقفة حاولت افرمل على قد ما قدرت لكن دخلت فيها برضة ومش فاكرة حاجة بعد كدة.
س : متى واين دارت احداث تلك الواقعة؟
ج : امبارح 13 أغسطس 2025 الساعة حوالي 6 الصبح في بنزينة شيل اوت على طريق الواحات.
س : ومن كان برفقتك أنذاك؟
كان معايا نزال صحبتی وبنت اسمها حبيبة صحبتنا بردو بس اعرفها معرفة سطحية.
س : وما هي كانت مناسبة تواجدك في المكان والزمان سالفي الذكر؟
ج : انا كنت نازلة عشان أجيب فستان حفلة التخرج بتاعى وروحت البنزين اقعد شوية لحد ما المحلات.
رونالدو يتصدر.. الكشف عن قائمة الأعلى أجرًا في الدوري السعودي