قطعة حشيش و500 جنيه.. تفاصيل مقتل شاب على يد شخص بمشاجرة أسلحة بالقليوبية (فيديو)

لم تكن المرة الأولى التي أحدث فيها المتهم وأصدقائه مشاجرة في منطقة المنشية الجديدة، فالجميع كان منتظر دوره في المشاجرة والقتل، وكان اليوم الموعود على أهالي المنطقة، يوم السبت الماضي الساعة 8 مساء، عندما فقدوا الشاب سيف الذي قتل غدرا وبالخطأ على يد شخص كان قاصدا قتل صديقه بشبرا الخيمة بمحافظة القليوبية.

وصلت محررة "الفجر" لمكان الواقعة، للكشف تفاصيل الحادثة، وتحدثت مع والده المجني عليه سيف ومجموعة من أصدقائه وشهود عيان.

وبالتحدث مع والدة المجني عليه سيف، قالت "سيف عنده 17 سنة، طلب مني أبيض الشقة وأجيب له سجاجيد جديدة عشان عايز يخطب، فرحت جدا أنه كبر وأخد القرار وهيحب وهيتجوز، وبدأت فعلا في التبيض وأجدد في الشقة، بس يا فرحة ما تمت".

وذكرت: كان في عزا جمبنا في بيت الجيران، سيف حط الموبايل بتاعه على الشاحن، ونزل العزا بعديها سمعت صوت ضرب نار، خرجت البلكونة أنادي عليه، لقيته  ماسك دراعه وداخل على البيت". 
 

واستكملت والدة سيف: "كان في مشاجرة وخناقة كبيرة قبل الحادثة بيومين، على چاكت حد لابسه من أطراف المشاجرة، في واحد أعجب بچاكت المتهم "مصطفى" فاخده ولبسه، بعديها مصطفى قاله الچاكت كان فيه 500 جنيه وقطعة حشيش، رد عليه قاله مكنش فيه حاجه".

وأضافت والدة سيف "بعديها بيومين حصل مشاجرة، وكانوا متربصين لبعض ومعاهم أسلحة، ابني كان واقف علي الناصية والرصاصة جت فيه، شوفته من البلكونه ماسك دراعه، حسيت فيه حاجه، جريت عليه لقيته مضروب تحت دراعه الشمال قريب من قلبه". 
 

وأكدت والدة سيف والدموع جاشية في عينها" كان جايب هدوم جديدة عشان يبلبسها مع أصحابه في رأس السنة، الهدوم موجودة مستنياه عشان تتلبس، محدش مصدق إن الروح الحلوة وضحكة البيت مشيت وسابتنا".

وبالتواصل مع صديق المجني عليه، قال سيف، ملهوش علاقة بالمشاجرة ولا يعرف الناس اللي فيها، كان واقف علي ناصية الشارع بتاعهم وقت ارتكاب الجريمة، بس الرصاصة جت فيه هو، أنا كنت في محل بشتري أكل، وأول ما سمعت ضرب نار، شوفت سيف مضروب وكان لسه عايش، اخدته على المستشفى، بس ملحقناش وتوفي".

وأضاف صديق سيف: كنا مرتبين هنخرج وهنفرح أول يوم في السنة، بس رأس السنة كانت ليلة حزن وتعب، سيف كان في ناس كتير بتحبه، وعملنا صدقة جارية باسمه على المصاحف وختمنا له القرآن. 
 

بدأت الواقعة بتلقى مديرية أمن القليوبية إخطارًا من قسم أول شبرا الخيمة يفيد ورود بلاغ بمصرع شاب يدعى «سيف ا» 17 عامًا، إثر إصابته بطلق ناري «فرد خرطوش» أودى بحياته.

وانتقلت الأجهزة الأمنية لمكان الواقعة وتبين مصرع المجنى عليه إثر مشاجرة مع آخرين بسبب خلافات مالية، فقام المتهمون بإطلاق أعيرة نارية صوب المجنى عليه أودت بحياته، وتم نقل الجثة إلى المستشفى وألقي القبض على المتهمين.

وحُرر محضر بالواقعة وتولت الجهات المعنية التحقيق فأمرت بدفن الجثة وشيع أهالى شبرا الخيمة جثمان الفقيد لمثواه الأخير بمقابر أسرته.

الضحية قبر الضحية جانب من اللقاء محررة "الفجر" مع والدة المجني عليه جانب من اللقاء جانب من اللقاء

المصدر: بوابة الفجر