سيد الطيب: هل في عضو لجنة حي ولا لجنة مقاومة ولا عضو نقابة ولا حزب بيتهم ما اتنهب؟

“يكون من الصعب عليك تصديق ..الحقيقة.. عندما تكون الأكاذيب هي بالضبط ما تريد سماعها”
هل صحيح الجنجويد بسألوا من بيوت الضباط واللجان بتوصف ليهم؟
يعني الجنجويد ما بدخلوا اي بيت الا يسألوا اول ده بيت منو؟
.. الحقيقة ..
الجنجويد احتلوا بيوت الاطباء والمعلمين وضباط الجيش والشرطة والتجار والمزارعين والمغتربين.

والفنانين والشعراء والملحنين والصحفيين..
هل في عضو لجنة حي ولا لجنة مقاومة ولا عضو نقابة ولا حزب بيتهم ما اتنهب؟ وما اتضرر من الحرب؟
طيب ليه في قناة طيبة وتلفزيون السودان ولايفات صفحات الكيزان كل الكلام عن اللجان متعاونة مع الجنجويد وبتوصف ليهم البيوت؟
مع انو ناس اللجان ديل نفسهم مافيهم زول بيتو ما اتنهب..
انت عارف وهم عارفين .. الجنجويد نهبوا كل البيوت بلا فرز.
نهبوا البيوت في المدن .. ونهبوا البيوت في القرى..
الجنجويد لصوص ما عارفين الفرق بين بيت الكوز الفاسد وبيت الثائر الشريف.
نهبوا بيوت اسر اتبنت بعرق جبينهم ودم قلوبهم وشقى عمرهم.
ونهبوا بيوت كيزان بنوها بالفساد وسرقة المال العام.
في الظروف دي لما يكون همك تصفى حساباتك الوسخة مع اللجان يبقى حربك الحقيقية ما مع الجنجويد وعامل حساب انك بكرة بتتفق معاهم وبترجعوا واحد زي ما كنتوا قبل اقل من عام.
وبينما انت شغال ده ما وقتو .. ده ما وقتو .. اعرف انهم مؤمنين انو ده الوقت المناسب جداً للقضاء عليك تماماً مرة واحدة والى الابد.

سيد الطيب

المصدر: موقع النيلين