«المصرى كيدز».. مرجان سليط اللسان

أدهم ولد نشيط ومنجز شاطر وذكى بيحب الكورة ولعب الكورة، وكمان بيحب يرسم ويلون وعنده كتير مميزات دايما على طول يحب يخلص كل حاجة وراه، ويوم تمرين الكوره تلاقيه جاهز فى المعاد ومتحمس جدا انه يروح التمرين بدرى كمان، بس دايما وهما بيلعبوا فى التمرين بتحصل حاجه مش تمام، أدهم يتعصب جدا جدا على صحابه وممكن يغلط فيهم ويقول الفاظ مش تماما ودا بيخلى اصحابه تزعل وميحبوش يلعبوا معاه، الكابتن كلمه كتير وقاله يا أدهم انت ولد شاطر لازم كمان لسانك يكون نظيف ومينفعش نغلط أو نشتم حد من أصحابنا ونقول كلام مش لذيذ.

فضل أدهم على الحال دا كتير وبعد ما كان فى التمرين بس بقى كمان يغلط فى أخته فى البيت ودايما بقت زعلانه منه، كلمته مامته وقالت لازم تعرف تعبر عن غضبك وزعلك بأسلوب احسن من كدا مش بالغلط والزعيق قال لها أدهم انا كل الناس مبقتش بتحبنى وبيدايقونى، قالت ليه طب تعالى احكيلك حكايه مرجان والكلام اللى مش تمام.

أخبار متعلقة

«المصري كيدز».. حدوتة.. (البطل إسماعيل)

«المصري كيدز».. «يفرغ المشاعر ويقوى الذاكرة» فوائد الرسم للأطفال

«المصري كيدز».. مميزات وعيوب التعليم المنزلى

مرجان ولد زيك تمام كان كل ما يتعصب أو يغضب يغلط أو يشتم فى حد، لسانه بقى يطول شويه ولانه اتعود انه يقول كلام مش تمام لسانه فضل يطول يطول لحد ما بقى خارج برا بقه والناس كلها بعد ما كانت بتخاف منه بقت تتريق عليه ويقولوا مفهوش غير لسان، تحب الناس تقول عليك زى مرجان؟، قالها لا طبعا مش هيحصل كدا فيا أصلا دى حدوته أى كلام.

ونام أدهم وحلم انه كل ما يتخانق مع اخته أو أى حد من صحابه لسانه يطول شويه وفضل يطول يطول لحد ما بقى لسانه طويييل قوى وسابقه فى أى مكان، وكل ما يحاول يدخله جوه بقه ميعرفش. وفجأة صحى من النوم مفزوع جدا وجرى على المرايا يطمن على لسانه وبقى خايف جدا يحصل فيه زى الحلم، وقال الحل إنى مش هشوف صحابى ولا اروح التمرين ولا أى مكان ومش هكلم اختى فى البيت، وفضل كدا يوم واتنين وكان زهقان ومن الزهق والملل نام تانى، حلم نفس الحلم تانى كل ما يقول لفظ مش تمام لسانه يطول شويه، بس لاحظ كمان انه لما شكر مامته على الاكل وقالها تسلم ايدك لسانه صغر شويه كتير وعرف ولاحظ انه كل ما يقول كلمه حلوه لحد لسانه يرجع يصغر تانى، فقرر انه هيقول كلام حلو لكل الناس وبقى لسانه طبيعى ولما صحى من النوم حضن مامته وشكرها انها حضرت ليه الفطار وباس أخته وطلب منها إنها تلعب معاه وكانت فرحانه جدا ومبسوطه، وبقى أدهم اجمل وألطف ولد بيقول كلام حلو وكل الناس بتحبه كمان.

هو و هي المصرى كيدز

المصدر: المصري اليوم