ميدو: «موهبة شيكابالا كانت تؤهله يلعب في أكبر أندية العالم»

وجه أحمد حسام ميدو نجم نادي الزمالك السابق رسالة إلى محمود عبد الرازق شيكابالا قائد الفارس الأبيض الذي أعلنه اعتزاله الساحرة المستديرة، أمس الخميس، بعد مسيرة حافلة بالإنجازات.

وكتب ميدو عبر حسابه بموقع التواصل الاجتماعي "إكس": "شيكابالا مش زي أي لاعب عادي، لأنه ببساطة كان إنسان قبل ما يكون لاعب كرة، ربنا أنعم عليه بالموهبة الفطرية، ومعاها قلب طيب زي معظم أهلنا في أسوان".

وأضاف: "محمود عبد الرازق أعرفه كويس جدا، صاحب جدع وراجل من صغره، ولما اتزاملت معاه في الملعب كان قيمة فنية نادر أنك تقابلها في الملاعب المصرية، ولما دربته سواء في الزمالك أو الإسماعيلي، كان لاعب فذ يقدر يقلب أي ماتش".

وأكمل: "شيكابالا أتولد في مدرجات حلمي زامورا، وأتولد وعاش جوة نادي الزمالك واختار أنه يكون أسطورة، على مدار 30 سنة لعب كورة في قطاع الناشئين والفريق الأول، وكما طريقه لحد ما أصبح كابتن تاريخي لنادي الزمالك".

وواصل: "موهبة شيكابالا كانت تؤهله يلعب في أكبر أندية العالم، لكن حتى لما في بعض الأوقات الحظ مكنش بيقف معاه والظروف تعانده، كان بيرجع لبيته الزمالك عشان يكمل معاه رحلته، ويفضل هو روح الزمالك".

وأردف: "في أوقات كتير كان الفريق مش في أحسن حالاته بس شيكابالا شايل الزمالك على كتفه، وحتى لما جة لاعيبة كويسة في وقت تاني، كان شيكابالا موجود كابتن بروح ميت عقبة بيدلهم على طريق البطولات ومنصات التتويج".

واختتم: "ودلوقتي بعد ما قرر يعلق حذاءه، ويحرمنا من متعة الفرجة على سحره في الملعب، مكانه الطبيعي الرجوع لمدرج التالتة يمين، ويتكتب أسمه بحروف من نور وسط أساطير الزمالك الكبار. رحلتك دلوقتي كادر مميز للزمالك والبداية بردوا من المدرج زي ما بدأت من 30 سنة يا ساحر".

المصدر: الأسبوع