كانت الهتافات السد السد الرد الرد

قاعد في أفكر في المسيرات الضربت سد مروي دي وقطوعات الكهرباء فعرفت انو سد مروي شايل حمولة كبيرة وانو مشروع ناجح عكس ما كنا بنسمع
وفر على البلد كتيير في الكهرباء وساعد في إنارة كثير من القرى و المدن والولايات
ومع السد ده تذكرت افتتاحه صادف مدعي المحكمة الجنائية أوكامبو
وكانت الهتافات السد السد الرد الرد
أوكامبو يا جمبان الشعب في الميدان
ومع ذكرى انقلاب ١١ أبريل تذكرت شعارات
سير سير يا البشير نحن جنودك للتعمير
ومع ده تذكرت برضو كان جابو دمية لأوكامبو وحرقوها
وكانت فعالية بالنسبة لينا في الوقت داك شغل رهيب ????????
ومنها تذكرت انتقاد الناس لوزير الإعلام خالد سلك في موضوع رج.

.م الهالك
و أنا بالنسبة لي شايف الموضوع ده فيهو رسالة معنوية و إعلامية زي حريق دمية أوكامبو
ممكن كتير من الناس شافو الكلام ده كلام تقليدي وأكل عليه الدهر وشرب وعوارة ساي
لكن يا حبيبنا أنت ما براك الشعب السوداني
في زول تلقاهو ماشاء الله قرأ بكالوريوس وحضر وسافر ماشاء الله له أن يسافر و داير يقارن نفسو بزول بسيط ممكن غير مدينتو وقريتو ما شاف شيء
وديل نسبة كبيرة جدا من الشعب السوداني
دائما بتحتاج تخاطبهم بمستوياتهم الإدراكية و المعرفية
والحاجه دي نبهني عليها أحد مشايخنا زمان مرات في مسألة بالنسبة ليك كطالب علم شرعي أو داعية بتكون واضحة زي ١+١
لكن في زول ممكن يشوفها معقدة وصعبة جدا فلمن تجي تشرحها ليهو لازم تتنزل لمستواه وتبسط ليهو الموضوع
وفي الأثر (حدثوا الناس بما يعقلون)
الآن في ناس شايفين انو التلفزيون القومي وقناة السودان ده موضوع فارغ ساي
بينما في ناس تانين لسه عندهم تقديس للقناة السودانية وبتابعها ليل ونهار وعندو الكلام البجي في القناة الرسمية ده شيء مقدس عديل
و مواقع التواصل الاجتماعي دي ليست الشعب و لا تمثل الشعب
وده من الغلط الكبير كونك تعتقد انو الفيس ده بمثل الشعب السوداني
و أنا عن نفسي قاعد أشوف فيه فارق كبير بين الواقع والمواقع
خاصة في الأحداث السياسية و الثقافية

مصطفى ميرغني

إنضم لقناة النيلين على واتساب

المصدر: موقع النيلين