بتروا أصابع ابني عشان بيدافع عن أخته.. فحص منشور جريمة أكتوبر.. صور

تفحص الأجهزة الأمنية بالجيزة منشورا تداوله رواد مواقع التواصل الاجتماعي حول تعرض شاب لبتر أصابع يده داخل كومباوند بأكتوبر بسبب دفاعه عن شقيقته من معاكسة بعض الشباب المسلحين.

وتداولت صفحات موقع التواصل الاجتماعي فيسبوك منشورا نشرته والدة المراهق المصاب سردت فيه تفاصيل الاعتداء الذي تعرض له نجلها.

وقالت والدة المجني عليه: اللي في الصورة دا زياد ابني عمره 15 سنة للأسف زي كتير من الناس دلوقتي فكرت إني آخد ولادي ونسكن في كومباوند راقي عشان نعيش في هدوء وأمان، لكن للأسف بعد كام يوم على انتقالنا لواحد من أقدم وأعرق الكومباوندز بمدينة ٦ اكتوبر مررنا بتجربة قاسية جدا ربنا يحفظ اولادكم منها.

ابني زياد نزل هو وأخته يوم 26 إبريل يشتروا حاجات من السوبر ماركت الموجود داخل الكومباوند وللأسف مجموعة من الشباب المتسكعين من الجيران عاكسوا البنت امام اخوها وشدوا شعرها فالولد لانه مش بتاع مشاكل اتصل بيا نزلت جري ورحت قلتلهم ميصحش وانتوا جيران واخوات وأخدت ولادي وروحت. بعدها بيومين زياد نزل لوحده رايح السوبر ماركت الولاد دول قابلوه وواضح انهم كانوا منتظرينه يكون لوحده واتريقوا عليه واستفزوه بكلام مش محترم وراحوا مطلعين سنجة ونازلين بيها على راسه. حاول يفادي نفسه صوابعه اتقطعت جرينا بيه ع المستشفى في محاولة لانقاذه وزي ما هو موجود في التقرير الطبي رايح بقطع صباعين ووتر.

طبعا عملنا محضر وهنمشي في اجراءاتنا بس اللي عرفناه من الجيران والأمن ان دي مش أول واقعة وأن البلطجية دول معروفين بالاسم في الكومباوندو بسببهم السكان بقوا بيخافوا يقربوا بالليل من منطقة تجمعهم عند السوبر ماركت واللي بيمارسوا فيها البلطجة وفرض السيطرة وتعاطي المخدرات ومحدش من الأمن الاداري بيقدر يقرب منهم واتعملهم محاضر قبل كدة وبترسى على مفيش يا اما بالتصالح او بطرق تانية.

وتابعت: احنا طبعا مش هنسكت بس كل خوفي ان حق ابني يضيع زي ما حصل مع ناس كتير قبله.. محتاجة دعمكوا عشان صوتنا يوصل والداخلية تضع حد لترويع الناس من شوية بلطجية اهلهم مكنش عندهم وقت يربوهم.

وتجري الأجهزة الأمنية بالجيزة تحرياتها لكشف ملابسات الحادث وضبط الجناة.

طباعة شارك جريمة أكتوبر بتروا صوابع ابني الجيزة التواصل الاجتماعي أكتوبر

المصدر: صدى البلد