مصور واقعة مطاردة فتيات الواحات يكشف كواليس لم ترصدها كاميرا هاتفه
تاريخ النشر: 17th, August 2025 GMT
حصل اليوم السابع، على نسخة من نص تحقيقات نيابة أول وثالث أكتوبر، في القضية المعروفة إعلاميا بـ"حادث مطاردة طريق الواحات" والمتهم فيها 4 شباب بمطاردة سيارة يستقلها 3 فتيات على طريق الواحات وتسببوا عقب إغلاق الطريق بالاصطدام في سيارة مقطورة الأمر الذى تسبب في إصابتهن بجروح في مختلف أنحاء جسدهن.
وإلى نص التحقيقات مع مصور حادث مطاردة طريق الواحات
س: ما صلتك بالواقعة محل التحقيق؟
ج: أنا شاهد الواقعة وأنا اللي كنت بصور الفيديو.
س وما هي إذًا تفصيلات شهادتك؟
ج. اللي حصل إن أنا كنت قاعد مع ناس أصحابي وسبتهم وبعدها دخلت بنزینة شیل أوت عشان كنت عايز أقعد شویة وساعتها كنت لوحدي وفضلت قاعد شوية كدا لحد ما حصل حاجة قدامي شدتني شوفت، بنات كانوا قاعدين في سيركل كي راحوا ركبوا عربيتهم مرة واحدة وبعدها علطول لاقيت فيه شوية شباب راحوا ركبوا عربياتهم وطلعوا وراهم بسرعة فأنا الفضول شغلني وطلعت وراهم بالعربية أشوف فيه إيه.. المهم طلعوا على طريق المحور وبعدها على طريق الواحات وكان فيه 3 عربيات عمالين طول الطريق بيزقوا على البنات اللي في العربية وفضلوا ماشیين معاهم وشوية قدامهم وشویة وراهم لحد ما البنات خبطوا في عربية نقل كانت على الشمال.. ساعتها كنت ركنت ونزلت وروحت لعربية البنات ولاقيتهم متعورين وبعدها وقفت واحدة ست علطول وخدتهم وطلعت على المستشفى وأنا روحت معاهم على المستشفى وفضلت معاهم هناك وبعدها روحت لحد ما لاقيت تليفون جايلي إن أنا مطلوب أقوالي وجيت النهاردة وبس ده كل اللي حصل.
س: متى وأين درات أحداث تلك الواقعة؟
ج: الكلام كان يوم الأربعاء الصبح على الساعة 6 الصبح تقريبا في طريق الواحات والحادثة كانت قدام مساكن عثمان.
س: ومن كان برفقتك آنذاك؟
ج: كنت لوحدي.
س: وما هي كانت مناسبة وجودك بالمكان والزمان سالفي الذكر؟
ج: أنا كنت مع ناس أصحابي قبلها وكنت مروح بس قولت أخش البنزينة أقعد شوية الأول وكان معايا مكالمة تليفون.
س: ما هي صلتك بالمحني عليهن؟
ج معرفش حد فيهم.
س: وما هي صلتك بالمتهمين؟
ج معرفش حد منهم
س: ما الذي أسترعي انتباهك تحديدًا؟
ج: أنا شوفت فجأة فيه بنات راحت ركبت عربيتها وطلعت برا على الطريق وفيه شباب راحوا ركبوا العربيات بتاعتهم وطلعوا ورا البنات.
س: كم عدد الأشخاص الذين أبصرتهم آنذاك؟
ج: أنا شوفت 3 بنات هما إلى ركبوا العربية بتاعتهم بس الشباب مقدرش أحدد كام واحد بس هما كانوا كذا حد.
س: صف لنا تحديدا ما أبصرته آنذاك؟
ج: أنا شوفت العربيات الثلاثة اللي فيها شباب من أول ما طلعوا من البنزينة كانوا عمالين يستعرضوا قدام البنات وعمالين يزنقوا عليهم ويرموا عليهم العربيات واللي راكبين العربية البي إم كان عمال يعمل درفت بالعربية بتاعته جمب البنات بعدين فضلوا يزنقوا على البنات بالعربيات بتاعتهم ويرخموا عليهم لحد ما البنات خبطوا في عربية نقل كانت راكنة على الشمال.
المصدر: اليوم السابع
كلمات دلالية: حادث طريق الواحات حادث الواحات اخبار الحوادث صور حادث طريق الواحات فيديو حادث طريق الواحات طریق الواحات لحد ما
إقرأ أيضاً:
المتهم الثالث بواقعة مطاردة فتيات الواحات: معرفش البنات و معملتش حاجة
حصل موقع صدى البلد على نص اعترافات المتهم مازن طالب بكلية الطب جامعة القاهرة، حوال اتهامه بمطاردة فتيات الواحات والتسبب في اصطدام سيارتهم بسيارة نقل.
وأدلى المتهم بواقعة مطاردة فتيات الواحات، باعترافات تفصيلية حيث أنكر اشتراكه مع آخرين في مضايقة الفتيات والتسبب في قيامهم بالاصطدام بسيارة نقل مما أحدث إصاباتهم، وأنه يمتلك ترخيص للسيارة وقام بتسليمه فور القبض عليه.
وقال المتهم بواقعة مطاردة فتيات الواحات، اللي حصل إني كنت مع واحد صاحبي روحنا نشرب حاجة في البنزينة وأول ما وصلنا لقيت شباب عايزة تطلع بعربياتها من البارك بتاع البنزينة وبيشاورلي أحرك عربيتي عشان قافل عليهم قولت لصاحبي تعالى تمشي الدنيا مش حلوة أصلا.
وتابع المتهم فعلا مكملناش دقيقتين واتحركت بالعربية وكذا واحد من الشباب مشيوا وكنت مروح بيتي في حدائق أكتوبر وأنا سايق كان على يميني وشمال عربيات تانية وعلى طريق الواحات شوفت عربية البنات كانوا ماشين معانا على الطريق.
استكمل المتهم الطريق كان فاضي والدنيا كانت هادية، وأنا كنت ماشي على سرعة 80 كم/س، وكنت ماشي أقصى الشمال وهما في الحارة في النص وكنت بحاول أدخل يمين عشان الطريق كان في إصلاحات وتقريبا البنات مكنوش مركزين فمعرفتش أدخل منهم وكانوا قافلين عليا.
أضاف المتهم روحت هديت سرعة العربية وعديت من ورا عربيتهم ومسكت أقصى اليمين ومشيت بسرعة وعديتهم وروحت على البيت، ومخدتش بالي أنا كنت سايق ومش مركز معاهم، وأصلا معرفش ولا واحدة فيهم، ومفيش بيني وبينهم أي علاقة، مؤكدا مكنش قصدي أزنق عليهم وهما ماشيين وكلام البنات ده ممكن يكون عشان يطلعوا تريند ويتشهروا.
قال المتهم مهند 24 سنة طالب بكلية الهنسة، أنه لم يقوم بالتعرض للمجني عليهم فتيات الواحات، أو ملاحقتهم وتتبعهم والتسبب خطأ في إصابتهم بأن قاموا بمضايقتهم هو وآخرين على الطريق، نافيا قيامه بقيادة مركبة على الطريق بطريقة ينجم عنها الخطر.
وقال المتهم بمطاردة فتيات الواحات، اللي حصل إني طالب بكلية الهندسة جامعة نوال الدجوي، وكنت نازل رايح الجامعة عادي كلمت صاحبي نتقابل برا قولت نروح نقعد في الكافيه لحد ميعاد الجامعة وقابلت واحد صاحبي عنها وطلعنا قعدنا في البنزينة وكانت الساعة 5.50 الصبح.
تابع المتهم فضلنا قاعدين لحد 6.10 الصبح وبعدين وأحنا بتركب العربية شوفت 3 بنات لابسين لبس مش كويس وبيركبوا عربيتهم عادي وأحنا طالعين بقولهم جايين في سباق نشد سوا بالعربيات، راحوا ضحكوا بس محدش اتسابق ولا حاجة.
استكمل المتهم بواقعة مطاردة فتيات الواحات، كملت طريقي وأنا راجع وكنت وراهم ومرة واحدة لقيت العربية خبطت في عربية نقل كانت راكنة على الشمال ركنت عربيتي ونزلت بسرعة اطمن عليهم وساعدتهم وخرجت واحدة منهم من العربية واطمنت عليهم وبعدين روحت الجامعة وبعدها اتقبض عليا.
فيما أدلى المتهم الأول عبد الرحمن . ج 18 سنة، طالب بكلية اقتصاد وعلوم سياسية، باعترافات تفصيلية حول الواقعة، وأنكر اشتراكه مع آخرين معلومين بالتعرض للمجنى عليهم كلا من "رنا . ا " و "نزال . ي" وكان ذلك بالطريق العام بأن ارتكبتم أمورا وإيحاءات وتلميحات جنسية، وذلك حول كونكم 4 أشخاص وقمتم بتكرار تلك الأفعال من خلال ملاحقة وتتبع المجنى عليهم.
وتابع المتهم بحادث مطاردة فتيات الواحات اللى حصل ان انا كنت نازل مع مازن متفقين ان احنا هنروح يوم الأربع ندفع فلوس كلية الشرطة وروحنا الصبح على بنزينة شيل اوت اللى في طريق المحور وقولنا هنقعد هناك شوية نشرب قهوة وبعدها نتحرك ولما دخلنا البنزينة، كانت زحمة اوى مكنش في مكان نركن فيه فا راح مازن قافل بعربيه على عربية من العربيات اللى راكنة وقال للناس هناك ان لو حد حب يطلع العربية بتاعتوا هو قاعد في سيركل كيه وبعدين قعدنا.
وأضاف المتهم بحادث مطاردة فتيات الواحات، بعد 5 دقايق في حد جه من الشباب الى كانت واقفة وقلنا ان هو عايز يطلع من الركنة ساعتها مازن قال خلاص احنا نتحرك للبيت واجيب فلوسي وبعدين نروح كلية الشرطة عشان ندفع الفلوس فا طلعنا ركبنا العربية وبعدها طلعنا لطريق بيت مازن، وخدنا طريق الواحات وكان في عربية بي ام وعربية جيلي وعربية افيو ماشيين جنبنا وكانت كل شوية العربية الافيو عماله ترمى علينا فا حبينا نطلع منها.
استكمل المتهم بواقعة فتيات الواحات مازن طلع قدام كدا وكان في عربية نقل واقفة مازن صحبي طلع منها وسمعنا بعدها صوت عربية بتخبط في العربية النقل وبعدها مشينا روحنا على البيت عشان ناخد الفلوس لكلية الشرطة وقعدنا شوية وبعدها دفعنا الفلوس وعلى الساعة 11 بليل في واحد كلم قريب مازن وقالوا ان هو معاون مباحث قسم ثالث وان هو عايز مازن فا انا روحت معاه عادى وبعدها طلب العربية بتاعة مازن فرجعنا جيبناها وروحنا على القسم وهناك لاقيتهم بيسالو مازن بيقولو مين كان معاك قالهم عبد الرحمن راحوا خادونى وخلونى في القسم وجيت النيابة النهارده وبس دا كل اللى حصل.
رونالدو يتصدر.. الكشف عن قائمة الأعلى أجرًا في الدوري السعودي