تامر حسني يحث جمهوره على أداء الصلاة: أنت مجاهد

طالب الفنان تامر حسني، متابعيه وجمهوره، على أداء صلاة في مواعيدها، موضحا أنه لا يحثهم من منطق الشيخ، بل يتحدث معهم كإنسان عادي، وأنه غير مواظب على أداء الصلاة حتى استقر في النهاية وتمت هدايته للصلاة في المواعيد.

وكتب تامر حسني، منشورا عبر صفحته الرسمية، على موقع التواصل الاجتماعي «فيسبوك»، قال خلاله: «أنت مش منافق أنت مجاهد، بوست طويل بس اللي هيقراه للآخر هيكون محتاجه جداً والله العظيم، بخصوص الصلاة هحكي حاجه حصلت معايا حبيت أشارككم بيها للي يهمه الأمر، فيه أكيد فيكم مش بيصلي أو بيقطع في الصلاة اللي بيقطع في الصلاه عايز أقوله، افضل قاوم شيطانك لحد ما تنتصر.

ده حصل معايا شخصياً أواظب وأقطع 100 مرة لحد ما استقريت مها أخد وقت ثوابك هيكون أكبر لأنك بتجاهد نفسك وشيطانك عشان خاطر ربنا».

وتابع: « في نوع تاني اللي بيقول ((هبدأ من بكرا )) و ميقدرش و يقول معلش بكرا وًميقدرش تالت و ميقدرش عاشر احب اقوله حتى لو عزمت النيه ١٠٠٠ مره و مش بتنفذ.. ربنا بيفضل مستنيك بمنتهى الحب لانه شايف مجهود نيتك في الاصرار على الرغبه حتى لو مش قادر تنفذ هيجازيك خير برضو على رغبتك حتى لو منفذتش لسه و هيبقى مستنيك تاخد القرار و فاتحلك ايده بكل حب عشان تنطلق و تدخل في رحمته و في معيته في الوقت ده بيبقى حواليك ناس يا بيشجعوك و دول ناس تمسك فيهم يا ناس مش بتصلي ياريت تبعد عنهم هما مش عايزينك تصلي غيره منك لانهم من جواهم مقتنعين بربنا بس بيكابروا فبيزعلوا عشان متبقاش اعلى منهم عند ربنا حتى لو في شيء من الذنوب بتعملها عادي كلنا خطائين اوعى تخليهم يقولولك يا عم انت بتعمل ذنب كذا و كذا ازاي تصلي يا منافق لا. و الف لا انت مش منافق».

انت مجاهد لنفسك و لشيطانك يعني في تحدي اكبر ثوابه اكبر بكتير عشان بقى خاطر ربنا غالي عندك و بتعمل اللي هو عايزه انك تصلي و كل ما تغلط تروحله هو بيحب كده و هيسامحك عادي، ولو غلط و روحتله ١٠٠٠ مره المهم ان كل مره يبقى عندك نية الارتقاء بنفسك معاه و تتصدق كتير صدقوني في قوه خارقه في تأثير الصدقه و في كل ذنب عليكم بالناس البسطاء فرحوهم اوي. ربنا هيفرحك اوي اوي انا مش شيخ يا جماعه ومش بتكلم كفنان لا انا بتكلم كإنسان انا بقالي سنين يمكن من اكتر الناس اللي بتقرا في العالم في كل الاتجاهات انا فعلاً بصحى من النوم بثقف نفسي و كل حرف بعرفه و كل معنى جميل اعرفه بحب اوصله ليكم دي انسانيات عشان احنا كبشر اخوات لازم نقوي بعض »

وأضاف: « الناس لازم تفرق بين معاملة البشر للبشر و معامله ربنا للبشر، يعني البشر لو مسألتش فيه يومين هو مش هيسأل فيك ١٠ و هيردهالك بس ربنا مش كده اوعوا تشوفوا ربنا بيعاملنا كده.. ربنا يعني الرحمه كلها بالعكس بيفضل يناديلك كل يوم ٥ مرات و لسنوات و انت مش بترد و بيقولك انا اكبر من اللي بتعمله تعالى اصلحلك روحك و اشوف احتياجاتك و اشفيك و اريح قلبك و انت بتهمله ومش مره لا سنين كتير و كل يوم ٥ مرات ينادي بعظمته و جلاله وانت برضو مش بترد و نسمعه بيقول في الآذان الله اكبر يعني يا فلان مهما كنت بتعمل ايه، انا اكبر و اهم.. تعالى خد مصلحتك و اعمل لروحك صيانه و مش ببلاش لا ده ربنا ساعتها بيكتبلك ملايين النجاحات و الاموال و الرحمات و اسقاط الذنوب و يفديك و يشفيك و ينور بصيرتك كفايه اسمك هيبقى مع الناس اللي مكرمهم تحت معيته و حمايته».

واستكمل: «و انت برضو مش بتروح ومش مقدر النعمه دي جرب تفهم وتحس ان لمًا نسمع آذان بيقول الله اكبر جرب انك تفهم المعني ان الله اكبر من اللي بتعمله دلوقتي حالاً وان ربنا مستنيك تطلب منه عشان يرضيك ويشيل ذنوبك ومهما كنت بتغلط وترجع تصلي عادي دا اصلاً لازم عشان تمسح الذنب اللي فات، الصلاه والصدقه بيمحوا السيئه والصدقه بتطفئ غضب الرب يعني هتنضف وتمسح في مشوارك مع ربنا غلطه غلطه وكمان هيبدلهم ليك حسنات في احلى من كده بالذمه!!!؟؟؟

و ممكن في دعوه صادقه يمحوا ربنا كل ذنوب عمرك تخيلوا بقى … ده لو ميتنج مع مديرك وعارفين انه هيهزئنا بنروح جري طب تخيلوا مقابلة ربنا لدقايق بيرحمنا فيها ويسمع طلباتنا وعايزين ايه ويحقق لنا امنيات حلوه بمواعيده هو لعلمه المسبق بمصلحتنا وفي امنيات بتتحقق فوراً لانها لمصلحتنا في الفور وكمان يشيل ذنوبنا».

واردف: «معقول نسيب الميتنج ده هو احنا يعني عشان مش بنشوف النتيجه ساعتها!!! اطمنوا هو الحق والصدق ثقوا في كل كلمه وكل وعد وعد بيه … يا جماعة في الآخره ربنا مش بس هيورينا اعمالنا لا هيورينا كمان هو شال من علينا ايه وفدانا بإيه هتعرفوا بقى قيمة الحمايه اللي ربنا كان عاملهالك بسبب صلاتك ورحمته هتبكي فرحاً من صدمة اللي هنشوفه

، وعلى فكره حتى اللي مش بيصلوا هما برضو في رحمته وبيرزقهم املاً في ان يرجعوله ده هو اللي خالقهم وبرضو بيرحمهم لانه رحيم بكل عباده بس اللي بيصلوا ويتصدقوا دول في معزه اخرى خالص وياما شوفنا ناس بتحارب الصلاه ودلوقتي بيصلوا وبقوا حاجه رائعه ناس بيشتغلوا ووسطيين عارفين يعيشوها صح بين الدنيا والاخره».

واختتم: «اوعوا تحسوا ان عشان في ناس في الزمن ده اتغيروا وبقوا بعيد اوي عن فكرة ربنا اصلاً وممكن يتريقوا عليك لو صليت او صومت.. ده الموضوع ده يخليك لازم تصلي اكتر من الاول عشان ثوابك بقى اكبر بكتير لانك تحولت من مجاهد لنفسك لمدافع عن ربنا بتدافع عنه بقوه قدام ناس دانت كده كمان بقيت جندي من جنوده بتحارب عشانه ويا بخت اللي ربنا بيستخدمه وكمان لو ربنا هداهم بسببك شوف بقى هتقش حسنات قد ايه يابن المحظوظه، هو دا صراع الدنيا هنآمن بربنا من غير ما نشوفه وهنعمل بالكنز اللي في القرآن اقسم بالله اقسم بالله اقسم بالله اللي عنده مصحف في بيته هو عنده الجنه ومش فاهمها عنده دليل واضح جواه اغلى من الكنز خصص في ال لايف ستايل عندك مهما كنت بتغلط عادي ربنا تواب وافضل قلل من ذنوبك افضل قللها واحده واحده ده اسمه جهاد مع النفس يعني شيء عظيم ربنا شاهد على مجهودك فيه حتى لو روحت وجيت وروحت وجيت كل دي محاولات ربنا يحبك اكتر عشانها وهتكسب في الاخر ان شاء الله، ربنا وصلاته والصدقة وبر الوالدين. وشغلك. واصحابك.اهتم بكل دول اليوم طويل ٢٤ ساعه عيشهم صح يا صاحبي عادي والله في وقت ونص لكل دول».

اقرأ أيضاً«أحسنتي يا بسمة».. تامر حسني يدعم طليقته بعد غنائها لغزة

تامر حسني لشهداء فلسطين: راحوا دار الحق و مشيوا من دار الباطل

تامر حسني يناشد الجمهور بالتبرع لأهالي غزة

المصدر: الأسبوع