تحقيقات واقعة فتيات الواحات.. الضحية الثانية تروى لحظات الرعب قبل التصادم

حصل اليوم السابع، على نسخة من نص تحقيقات نيابة أول وثالث أكتوبر، في القضية المعروفة إعلاميا بـ"حادث مطاردة طريق الواحات" والمتهم فيها 4 شباب بمطاردة سيارة يستقلها 3 فتيات على طريق الواحات وتسببوا عقب إغلاق الطريق بالاصطدام في سيارة مقطورة الأمر الذى تسبب في إصابتهن بجروح في مختلف أنحاء جسدهن.

وإلى نص التحقيقات مع المجني عليها الثانية "انزال.

ي".. س : ما تفصيلات شكواك؟

ج : "أنا كنت في البيت وكلمتني رنا علشان هي حفلة تخرجها يوم 21 أغسطس 2025، وكانت عايزة تشتري حاجات لحفلة التخرج فكلمتني يوم 13 أغسطس الصبح وقالتلي تعالى ننزل نشتري حاجة وعدت عليا بعربيتها ورحنا محطة بنزين في الحي الأول وقعدنا أنا وهي جو الماركت وأول ما دخلنا لقينا كل اللي برة شباب قلنا ندخل جو أحسن وطلبنا حاجة وقعدنا عادي والشباب اللى كانوا قاعدين ناحية اليمين واحنا داخلين نقلوا وقعدوا قدامنا علشان أحنا كنا قاعدين على الزجاج وباينين ليهم فقلنا للولد اللي شغال جوة عايزين ننزل الستائر علشان منبقاش باينين وعلشان نقعد براحتنا".

وتابعت المجني عليها: " وفى واحدة صاحبة رنا بس مش صحاب قوي كلمتها سألتها أني فين قالتلها على المكان فقالتلها هجيلكم وجت فعلا وقعدت معانا شوية وأسمها حبيبة ومنعرفش أي معلومات عنها هي معرفة سطحية والعمال اللى جو طلبوا مننا نطلع نقعد بره علشان هيمسحوا الأرض فطلعنا بره وطول ما أحنا جوه مكنش الشباب اللى بره مكنوش بيضايقونا وكانت نظرات بس، ولما طلعنا بره كان النهار بدأ يطلع وجايين نمشي رنا دورت العربية راحوا هما قاموا ودوروا عربياتهم وتحركوا هم الأول قبلنا ومجاش في دماغنا أنهم هيمشوا ورانا لحد ما طلعنا على طريق الواحات لقينا الـ 3 عربيات ورانا فقلت لرنا أهربي منهم وأجري علشان نتوه منهم فراح الولد اللي راكب عربي بي ام دابليو راح ناحية اليمين وأنا قاعدة جنب رنا وقال لنا أنتوا رايحين فين طلب نقعد شوية وطلب نركن على جنب.

واستكملت: انا طلبت من رنا نقفل الزجاج وهي عماله تهرب منهم وراحت ناحية الشمال وفى الاخر بتاع البى ام راح على اليمين ومعاه واحد راكب كيا وهي ودايسة على الفرامل وحنا بنهرب منهم ملحقتش توقف العربية ومكنش في دماغنا أننا نخبط أصلا وفضل بتاع البي أم جنينا وكان شايف أن في عربية نقل قدامنا على الطريق وزنقنا أننا منعرفش نتحرك فمفيش حل قدامنا غير أنان نطلع على الرصيف أو نخبط في العربية النقل أو نخبط فيه هو وخبطنا في العربية النقل وهما طلعوا يجروا كلهم أتصبت أنا ورنا وحبيبة محصلهاش حاجة ولقيت وشي كله دم وايدي محشورة في الاكصدام علشان أشلها قطعت هدومي وطرحتي اتقطعت وشعري أتكشف فكلمنا صحابنا علشان يجوا يلحقونا، ورحت على مستشفي 6 أكتوبر المركزي وعملنا إشاعات أحنا الـ 3 والحمد لله ملقناش كسور.

المصدر: اليوم السابع