كنت بطلع على مواسير الصرف.. أقوال المتهم بقتل شخص لإقامة علاقة مع زوجته بالبدرشين

تزامنًا مع جلسة الحكم، غدا الأربعاء، على سيدة وعشيقها لاتهامهما بقتل زوجها، وذلك بعد إحالة أوراقهم لفضيلة مفتي الجمهورية لإبداء الرأي الشرعي في إعدامهم، ننشر أقوال المتهم بقتل زوج عشيقته في تحقيقات النيابة العامة.

حصل موقع "الفجر" على نص أقوال المتهم "محمد. ع" بقتل شخص بمساعدة زوجة الثاني بالبدرشين للعيش مع بعضهم البعض بعد الخلاص منه، وذلك على خلفية التحقيقات رقم في القضية 8238 لسنة 2023 جنايات البدرشين والمقيدة برقم 12 لسنة 2023 حصر تحقيق جنوب الجيزة الكلية.

قال المتهم في تحقيقات النيابة العامة: اللي حصل إن دينا عربان تبقى بنت عمى، ومن حوالى خمس شهور كانت هي فاتحة محل ملابس حريمي عندنا في دهشور، وبعد ما فتحت بشوية كان في شباب بدأوا يعاكسوها في المحل، فأنا عرفت بالصدفة أن الناس دي بتضايقها فروحت لهم وزعقت معاهم، وقولت لهم المحل ده يخصني واللي فيه دي تبقى بنت عمي عشان محدش يعمل معاها مشكلة.

وتابع المتهم: بعد كده روحت المحل عندها وطلبت منها رقم تليفونها بحجة أني عايز ملابس رجالي منها وهي قالت لي أدور لك، وفعلًا بدأنا نتكلم من نحو 4 شهور بدأناها أن أحنا تكلمنا على واتساب وعلى التليفون، وبعد نحو أسبوعين ثلاثة لقيت واحنا بنتكلم قالت لي أنت وحشتني وتعالى أقعد معايا شوية، فأنا قولت لها خلاص ماشي أنا جاي وفعلًا روحت البيت عندها، بس عشان مكنتش أقدر أطلع لها من الباب لقيتها هي بتقولي امسك في الماسورة واطلع لي، فأنا عشان كده كنت بمسك في الماسورة وطلعت البيت من شباك الحمام، ولقيتها حطاه لي سلم حديد عشان أنزل عليه وفعلًا نزلت.

 

وأردف المتهم: ودخلت الشقة بتاعتها وهي كانت قاعدة لوحدها وفي اليوم ده عاشرتها معاشرة الأزواج، وفعلًا استمرينا على الوضع ده كل يومين بروح لها وأمسك في الماسورة وساعات كنت ببيت معاها في البيت، وفي خلال الفترة دي حبينا بعض جدًا ومبقناش نقدر نستغنى عن بعض لدرجة أن أنا اللي كنت بقولها تلبس ايه وما تلبيسش ايه وهي فعلًا كانت بتسمع كلامي، وفي خلال الفترة دي هي قالت لي إنه ا الدورة مجتش عندها ولما عملت اختبار حمل طلعت حامل.

 

وأضاف المتهم: قالت لي أعمل إيه وأنا ساعتها قولت لها لازم تنزليه وفعلا جبتلها شريط برشام للإجهاض اشتريته من واحد بيبيع حاجات شمال واديتهولها، ونزل عليها دم وبعديها راحت للدكتورة وقالت لها لازم نعمل عملية كحت وعملتها فعلا والموضوع عدا كأن الحمل كان من جوزها، ومن نحو شهرين كان محمد جوزها ضاربها فهي اتصلت بيا وقالت لى حقي عندك، أنا لازم أبقى معاك واحنا لازم نخلص منه وعشان كدا بدأنا نفكر إزاي نخلص منه عشان تعرف نتجوز.

 

وأشار المتهم: ساعتها احنا قعدنا نفكر أزاي تخلص منه وفعلًا أنا قولت لها أنا هخلصك منه وهضربه بالنار وهو ماشي في الشارع، بس ساعتها أنا معرفتش أضربه بالنار لأن مكنش معايا طبنجة، وبعد كده قولنا نسمه، ومن نحو أسبوع اتفقت أنا وهي أن حلها بنج كلى أو أى حاجة منومه عشان نديهاله، كنت سمعت أن البنج ممكن يعمل توقف في عضلة القلب وتموته من غير ما يبان أن احنا لينا دعوة بالموضوع، وتبان أن هي موته طبيعية وفعلا انا سألت زمايلي وحد فيهم قالي على برشام منوم، وفعلا يوم الخميس نحو السـاعة 3 أو 4  العصر أنا روحت الصيدلية اسمها مكة المكرمة وروحت للصيدلي وفعلًا هو اداني البرشام أول ما طلبته وجبت منه شريطين كل شريط في عشرة أقراص.

وكشف المتهم خلال أقواله أمام جهات التحقيقات: وأول ما جبته كلمت دينا وقولت لها تعالى قابليني أنا جبت لك المنوم وفعلًا اتقابلنا عند سوبر ماركت عندنا واديتلها المنوم الشريطين، ومشيت ولما كلمتها قالت لي أن محمد. ع جوزها جاي من الشغل تعبان والدكتور كاتب له على دواء ومحاليل وهي حطت له أقراص من المنوم ده في المحلول عشان يدخل دمه لأن انا كنت عارف أن البرشام دا ممكن يوقفه قلبه.

وأفاد المتهم: لكن جوزها أول ما حس أن في حاجة مش طبيعية في جسمه راح شايل المحلول على طول ومرضيش يكمله واليوم خلص على كده، جينا يوم الجمعة كلمتني بعد الصلاة وقالت لي إحنا لازم تخلص منه النهاردة دي أنسب فرصة تخلص منه فيها لأنه تعبان ومش هيحس بحاجة، فأنا قولت لها لا مش هينفع أجي فهي قالت لي عشان خاطر نكون مع بعض ونكمل مع بعض، وفعلا أنا روحت عندها البيت نحو الساعة 5 مساءً وفضلت واقف عند الماسورة تحت وكان معايا حديدة وطلعت على الماسورة للشقة ودخلت من شباك الحمام، ولقيت دينا قاعدة لوحدها ودخلت وهي دخلتني الدولاب.

وأردف المتهم خلال أقواله أمام جهات التحقيقات: وأنا سمعت صوت أنه ماسكها بيضربها فطلعت من الدولاب لقيته دايس عليها برجله، وأنا خارج من الأوضة لقيته قدامي فضربته بالحديدة اللي كانت معايا على دماغه ثلاث ضربات قاصد أموته، وهو ساعتها مسك دماغه عشان جابت دم ووقع على الأرض، وبعدين لميت كل الفلوس اللي في الشقة عشان أنا كنت عارف مكانهم فين، وكمان هي قالت لي على مكانهم وكان في طبنجة أخدتها هي كمان ونزلت من شباك الحمام زي ما طلعت، وهي دينا بعد ما نزلت كركبت الشقة عشان تبان أنها عملية سرقة، وبعد كده بعتلها على الواتس قولت لها متحركيش أي حاجة غير لما أروح وأبعد عن المكان عشان أبقى في الأمان.

واختتم المتهم خلال أقواله أمام جهات التحقيقات: وبعد كده أبو دينا كلمني وقالي الحق في حد نط عندهم في البيت وضرب محمد.ع جوز دينا وضرب دينا والاثنين غارقين في دمهم، فأنا روحت مستشفى الإسلامية لقيت أن محمد مضروب في دماغه روحت شايلة معاهم حطيته في الإسعاف، وبعدين روحت البيت ولقيت الحكومة تاني يوم جات وكانت عايزاني وروحت معاهم المركز.

المصدر: بوابة الفجر