رمضان فرحة

اسمحولي التحدث بالعامية في هذه المقالة.

رمضان فرحة وخير وبركة وكمان عبادة مكثفة، يعني لو مش متعود تقرأ القرآن الكريم كتير في الشهور الثانية هيبقى عندك فرصة تقرأه في رمضان أكتر من مرة وتتمعن في تفسيره.

كمان بتصوم أيام فريضة تريح فيها جسمك وأعصابك ونفسيتك من أي عادات غير صحية ودة كافى يحميك من الأمراض الجسمية والنفسية.

كمان عندك فرصة تصلي فوق الفريضة التراويح والنوافل وتاخد عليهم أجر مضاعف، غير أجر ليلة القدر خير من ألف شهر، غير كمان فرصة صلة الرحم والتواصل مع المعارف وفرصة للزيارات والالتقاء بعد فترة من الابتعاد بسبب انشغالات الحياة، غير كمان زكاة الفطر فريضة في رمضان إلى ما قبل صلاة العيد، وبعدها فرحة العيد والمحبة والود.

لكن متنساش:

1- العبادة لله مش لرمضان، عود نفسك على مواصلة العبادة لله إلى ما بعد شهر رمضان المبارك، وخلى رمضان بداية جديدة لعودة الصلة مع الله وكمل تواصل، فرب رمضان رب كل الشهور.

2- علم ولادك إن رمضان فرحة وهات لهم فوانيس وزينة ومفيش مشكلة من مسلسلات رمضانية كوميدية أو كرتونية مناسبة زي بكار وبوجي وطمطم.

3- خد ولادك الجامع يصلوا.

4- الصيام مش بس عن الأكل والشرب لكن برده صيام نفسى عن اللغو والعصبية، ومحاولة الهدوء وتمالك النفس وضبطها.

5- استقبل رمضان بنفس هادئة، ومفيش مانع من حلوى رمضان وعصائره لكن مش كتير عشان الصحة.

6- تذكر إن رمضان شهر الصيام مش شهر الأكل يعنى مش لازم تسرف فى الشراء وتحضير الأطعمة الزائدة إللى ممكن تهدر وتتلف فى النهاية بدون فائدة.

7- ممكن تتصدق بطعام لفقير أو فرحة طفل أو صلة مع الطيبين أو إبتسامة طيبة فى وجه شخص مكروب تزيل بها همه أو سؤال عن شخص وحيد أو زيارة مريض.

8- رمضان شهر فرحة خليك للناس فرحة.

رمضان كريم.. كل عام وأنتم بخير.

اقرأ أيضاًقبل ساعات من بدء شهر رمضان 2025.. أفضل دعاء «مكتوب» |ردده الآن

هنبدأ الصيام بـ13 ساعة.. إمساكية رمضان 2025 ومواقيت الصلاة ومواعيد الإفطار والسحور

اللهم بلغنا رمضان ونحن بأحسن حال لا فاقدين ولا مفقودين.. أدعية لاستقبال شهر رمضان 2025

المصدر: الأسبوع