كلام بالعقل

من بين ثمار الإبداع المتناثرة هنا وهناك، تطفو على السطح قطوف دانية، تخلق بنضجها متعة تستحق التأمل، والثناء، بل تستحق أن نشير إليها بأطراف البنان قائلين: ها هنا يوجد إبداع… هكذا تصبح “قطوف”، نافذة أكثر اتساعًا على إبداعات الشباب في مختلف ضروبها، قصة، شعر، خواطر، ترجمات، وغيرها.. آملين أن نضع عبرها هذا الإبداع بين أيدي القراء، علّه يحصل على بعض حقه في الظهور والتحقق.

“سمية عبدالمنعم”

 

 

 

كلام بالعقل..
افترقنا قبل اللقا
والتقينا بعد الفراق
وراح لحاله الاشتياق

حاجات بالشكل..
ليه قسناها بالتعب
ومحدش فينا كان تعب
احنا ابتدينا بالفراق

(Senio)
يعني احنا كنا فـ يوم واصلين
لحاجة واحنا مغمضين
يعني اللي بنّا أكيد بيقلّ..
ضاع م العمر أيام وسنين
واحنا بقينا اتنين تانيين
ونحب بعض أكيد مش حلّ

 

(2)
كأنها ماتت..
الحاجات الي عاشت
واللي يوم علينا هانت
قدامنا بس مشفنهاش

ومفهمناش..
إنه مش لايق علينا
نحسّ بقيمة اللي فـ إيدينا
ده الحب نفسه ميعرفناش

(Senio)
يعني احنا كنا فـ يوم واصلين
لحاجة واحنا مغمضين
يعني اللي بنا أكيد بيقلّ..
ضاع م العمر أيام وسنين
واحنا بقينا اتنين تانيين
ونحب بعض أكيد مش حلّ

 

(3)
متحسبهاش..
اللي بـنّا مـبقاش ما بـنّا
كل حلو اتمررّ فـ ثانية
واللي متهناش بدنيا
بكرة تضحكله الحياة

متصعبهاش..
كل دي تفاصيل كتيرة
كفاية خوف ولوم وحيرة
معدش فاضل حلول بديلة
ولا حتى فارق قولة آه

(Senio)
يعني احنا كنا فـ يوم واصلين
لحاجة واحنا مغمضين
يعني اللي بنا أكيد بيقلّ..
ضاع م العمر أيام وسنين
واحنا بقينا اتنين تانيين
ونحب بعض أكيد مش حلّ
كلام بالعقل!!

المصدر: بوابة الوفد