الموزع الموسيقي أحمد إبراهيم يكشف عن أعماله المقبلة مع عمرو دياب
تاريخ النشر: 6th, July 2024 GMT
كشف الموزع الموسيقي أحمد إبراهيم عن علاقته بالفنان عمرو دياب، موضحًا إنه يحضر لعدة أعمال غنائية معه بجانب ألبوم جديد.
أعمال أحمد إبراهيم مع عمرو دياب
وقال أحمد إبراهيم في لقاء تليفزيوني: عندنا شغل نازل قريب، وشغالين على أكتر من أغنية إلى جانب ألبوم، ولسه منزلين أغنية من كام يوم وهو منزل أغنية بعدها وببارك له على حفلة بيروت الأسطورية.
كما تحدث أحمد إبراهيم عن الهضبة مشيرًا أنه يستفيد من خبراته حتى الآن، وينبهر بمساعدته للجميع والتي لا يعرف عنها البعض شيء قائلًا: عمرو دياب بالنسبة للوطن العربي رصيد كبير من الحب والنجاح ومشوار أربعين سنة، وإحنا كلنا فرحانين به، وأنا بشكل خاص بأمانة كراجل مصري فرحان أن الراجل ده بيشتغل في بيتي وبيمثل فننا، وفيه ناس كتير بتقول لي أنت بتعتز بشغلك معاه، لكن لأ أنا بعتز بحاجة أكبر، ورغم 22 سنة شغل والخبرات دي كلها بقعد جنبه لحد اللحظة دي بجد بحس أني لسه ببدأ.
وأوضح أحمد إبراهيم: عمرو دياب عنده خبرات مش طبيعية وحب ومساعدة للناس كلها الناس متعرفش عنها حاجة، وعمرو دياب بيعمل حاجات كتير بره الشغل محدش يعرفها، وشخصية أجمل من كده وجدع جدًا مع الناس كلها وطول الوقت دعم لما يلاقي حاجة كويسة وعاوز الناس تشتغل وتنتج ومش بيركز غير في شغله، ونفسي الناس تركز في شغلها زي عمرو دياب.
آخر تواصل له مع شيرين
كشف أحمد إبراهيم إنه يحضر لمجموعة أغاني جديدة مع شيرين عبد الوهاب، مشيرًا إلى أن آخر اتصال بينهما كان من نحو 5 أشهر، واتفقا على تحضير أغاني لكنه انشغل بعدها بأغاني عمرو دياب.
وقال أحمد إبراهيم في تصريحات تليفزيونية: آخر اتصال حصل بينا من خلال أحمد سعد، كان من أربع أو خمس شهور، ودي كانت آخر مرة سمعت صوت شيرين واتفقنا على أكتر من أغنية واتفقنا نعمل حاجات زي اللي بدأنا بيها زي مشاعر ومتحاسبنيش، وآخر واحد في الدنيا وحبه جنة، وفي أغنية بالفعل من كلمات تامر حسين وألحان مدين من بعدها اتشغلت بألبوم عمرو.
وأضاف: شيرين المفروض ليها مكانة كبيرة، وهي عارفة مكانتها عند الناس، والإنجليز دايما بيقولوا المشكلة إنك فاكر إن لسه عندك وقت، لكن الوقت بيسرقك.
أحمد إبراهيم يشيد بفيلم ولاد رزق 3
وأشاد الموزع الموسيقي أحمد إبراهيم بفيلم ولاد رزق 3، بعد حضوره افتتاح الفيلم في الرياض، وقال: فيلم رائع والناس كلها عاملة شغل رائع وإنتاج ضخم وعظيم وطارق العريان مخرج عبقري وأخ ليا كبير، وببارك له وببارك لموسى عيسى المنتج، ولكل الفنانين أصدقائي أحمد عز وعمرو يوسف وهو فيلم ضخم وإنتاج يشرف ومبسوط إني في الرياض وعاوز أقول للجمهور اللي أنتم شايفينه في الفيلم في الحقيقة أحلى وأحلى.
وتابع: الفنان الحقيقي والموهوب بجد لما بيكون فيه تحت إيده إنتاج وثقة ودعم كبير جدًا بتقدر تحقق كل الأحلام اللي جواك كشخص موهوب، وأنا نفسي أشوف جزء رابع له وأجزاء تانية، وفكرة وجود فنانين بالحجم ده صعب تواجدهم في مكان واحد إلا لو فيه بينهم حب
المصدر: بوابة الفجر
كلمات دلالية: أحمد إبراهيم عمرو دياب شيرين عبد الوهاب أحمد إبراهیم عمرو دیاب
إقرأ أيضاً:
رامي إمام يكشف رد فعل والده الزعيم على فيلم “البحث عن فضيحة”
كشف المخرج رامي إمام عن بعض التفاصيل الخاصة بالزعيم عادل إمام، وتطرق رامي إلى أعماله الفنية كاشفا عدد من التفاصيل التى يعلن عنها لأول مرة.
وقال رامي إمام: أنا عملت أعمال كتير منها أمير الظلام، وجميع المسلسلات اللي فيها أكشن ودراما، لكن دايمًا لما الناس توقفني في الشارع تسألني عن غبي منه فيه، وفين الجزء التاني، وكمان فيلم 1/8 دستة أشرار، الفيلم ده من أحلى الأفلام اللي قريبة لقلبي، التجميعة دي مكنتش متواجدة سنة 2006، وكان فيه روح حلوة، والأجواء واللوكيشنز كانت حلوة، وياسمين عبد العزيز إنها تقول نجيب نيكول سابا تبقى موجودة علشان تضيف كفنانة في ناحية الجمال البلدي اللي بتلعبه.
وأما عن تعاونه مع والده عادل إمام فى عدد كبير من أعماله أكد رامي إمام على أن العمل مع عادل إمام لا يختلف كثيرا عن العمل مع مجموعة النجوم الكبار، مضيفا: لأن في الأول وفي الآخر كل فنان ليه توجه وفكر معين، هو أبسط واحد موجود في اللوكيشن، وبيتقبل توجهات المخرج، وبييجي بدري، وتجربتي معاه الناس كلها تشهد عليها، والعراف من أحلى الأعمال، والناس في الشارع بتكلمني عن صاحب السعادة قد إيه مأثر فيهم.
وأوضح رامي إمام : بحب أشوف لوالدي فيلم “المشبوه”، ده من أكتر الأفلام اللي بحبها، لأني عارف كواليسه وإزاي كان تحدي إن والدي يعمله، وصعب النهاردة تجمع بين سعاد حسني وعادل إمام، الأداء التمثيلي ده حاجة تتدرس، وأتمنى أعمل له ريميك.
وقال رامي إمام عن فيلم “البحث عن فضيحة” الذى يتعاون فيه مع الفنان هشام ماجد: هشام ماجد بنعمل مع بعض البحث عن الفضيحة، هو حبيبي ومحترم وبيحترم شغله وهادي، ووالدي عادل إمام رحب بالتجربة، وهي مهمة أوي وليا على المستوى الشخصي إننا نعرف الجيل الجديد بأفلامنا والتراث الفني القديم.
وعن أعماله الجديدة، أشار إلى أنه يستعد لتقديم مسلسل عودة التلفزيون مع المؤلف يوسف معاطي، وهو موضوع مهم وجديد، ومن المقرر عرضه بعد رمضان، ويعد عودة له بعد غياب 5 سنوات.
حالة الطقس.. استمرار هطول أمطار رعدية مع رياح نشطة مثيرة للأتربة