الأبحاث الجيولوجية تتهم مليشيا الدعم السريع بسرقة معرض الظواهر الطبيعية
تاريخ النشر: 26th, April 2025 GMT
إتهمت الهيئة العامة للأبحاث الجيولوجية (الذراع الفني لوزارة المعادن) مليشيا الدعم السريع بسرقة معرض الظواهر الطبيعية في السودان والذي يحتوي على مجموعة من النيزك النادرة إلى جانب الأشجار المتحجرة.وقالت الهيئة انها منذ تأسيسها في العام 1905 ظلت ترصد وتدرس وتسجل تأثيرات الظواهر الطبيعية كسقوط النيازك والزلازل البراكين من خلال تسيير البعثات الجيولوجية لانشاء متحف متخصص خاصة للنيازك واتاحت للجميع زيارته خاصة المهتمين بأبحاث علوم الأرض والفضاء وطلاب العلم.
المصدر: موقع النيلين
إقرأ أيضاً:
(مليشيا البيع العشوائي من الرصيف للأمن القومي)
( مليشيا البيع العشوائي من الرصيف للأمن القومي )
موضوعنا الليلة يا جماعة مهم جدا و خطير لابعد حد و محتاجين نوصلو لكل الجهات المختصة في الدولة لانو بيمس الأمن الداخلي و الامن الاقتصادي و البنية التحتية و الأمن العام ، و البيئة و الصحة العامة ، عشان كده اعمل ليك كباية قهوة خالي سكر و دواء و تعال اقراء و ساعدنا بمشاركة المحتوى لو سمحت .
شاهدت مقطع فيديو لواحد بيبشرنا بعودة الحياة لمدينة بحري الحبيبة و بيظهر في الفيديو واحد من الناس البيفرشو بضاعتهم على رصيف المحطة الوسطى بحري بشارع الكنيسة ، و بمجرد ما شفت الفيديو جاني إكتئاب والله ، معقولة ح نفرح لعودة عدم النظام ؟؟ معقولة ح نرجع تااااااني لعهد الفوضى المقننة و تحت رعاية المحليات و الدولة ؟؟
بعض الناس العاطفيين جدا بيشوفو تحت كرعينهم و من باب الانسانية شايفين إنو هجومنا على الفريشة و الباعة المتجولين ما فيهو رحمة و إنسانية .. و من خلال المنشور ده انا ح اوريكم خطر الفريشة على المواطن والدولة و اقتصادها و أمنها و نظامها .
آخر الناس المتضررين من البيع العشوائي هم اصحاب المحلات النظامية ، التجار النظاميين البيدفعو ضرائب و رسوم و كهرباء و في النهاية بيلقو روحهم محاصرين بمليشيات البيع العشوائي قدام محلاتهم و في النهاية النتيجة بتكون خسائر للتجار و اغلاق للمحلات و بطالة و إنهيار للاقتصاد المحلي من الداخل .
خلونا من التجار لانو مفترض يكون عندهم غرفة تجارية او اتحادات بتمثلهم و بتدافع عنهم ، تعالو نشوف من ناحية المظهر الحضاري للمدينة ، ح نلقى في تشويه كامل للمظهر العام ، ارصفة كاملة فقدناها تماما و طرق مزدحمة و المدينة كلها ح تصبح سوق عشوائي بالإضافة لتخريب البنية التحتية ، تخريب للأسفلت و تدمير للارصفة لانو الباعة ديل بيحفرو داخل الاسفلت و الارصفة عشان يثبتو اخشاب و عواميد للمظلات و بيمشو لابعد من كده بيوصلو توصيلات عشوائية للكهرباء عشان ينورو مظلاتهم بالليل ، و ما كده بس يا جماعة ، ديل بيقفلو نظام الصرف الصحي في الشوارع الرئيسية و في اول مطرة بتغرق الاسواق و يتضرر اصحاب المحلات الصارفين عليها الملايين و يعطلو حركة السير .
الفوق ده كلووو كوم و الجاي كوم تاني خالص لامن تعرف خطر الفريشة على الأمن العام ، ذي ما الخيران و البِرك بتعتبر بيئة حاضنة للناموس ح نلقى انو البيع على الطرقات و الارصفة عبارة عن بيئة حاضنة للنشالين و تسعة طويلة و تحركات الحرامية و المتحرشين لانو ببساطة كده الزحمة البيسببها البيع العشوائي بتشل حركة الدوريات و الاسعافات و الدفاع المدني و بتفقد كاميرات المراقبة اهميتها لانها بتخلق نقاط عمياء كتيرة جدا للكاميرات ، حتى الشرطي البكون واقف في الشارع ما بيقدر يعمل مراقبة ميدانية للموقع بسبب الزحمة و العوائق البصرية .
يااااخ اتحدى اي زول يكون متذكر منظر بحري القديمة ، اجمل شوارع و بيوت في بحري العريقة جدا و التراثية اختفت معالمها بسبب البيع العشوائي ، مافي زول بيكون متذكر شكل الكنيسة في المحطة الوسطى او شكل الجامع الكبير في بحري ، مااافي زول فيكم ح يكون متذكر شكل المحلات بموقف التاكسي في سوق امدرمان او اي معلم اثري قديم في ولاية الخرطوم بسبب البيع العشوائي .. يا جماعة الرزق الحلال ما بيعني الفوضى ، من الساهل جدا انو نلوح بي بعض القصص الانسانية عشان نبرر للفوضى لكن في الحقيقة ده اسمو استغلال الرحمة في صناعة الفوضى .
للاسف الشديد جدا إنو بعض المحليات او اغلبيتها بتتعامل مع الفوضى دي باعتبارها مصادر دخل رسمية و غير رسمية .. رسمية بالجبايات و غير رسمية بالرشاوي ، بعض الموظفين الكبار في المحليات هم السبب الرئيسي في الفوضى دي فاذا كانت حكومة كامل ادريس بتسعى لفرض هيبة الدولة و القانون و اعادة النظام مفترض تحارب البيع العشوائي قبل السكن العشوائي ، مفترض يكون في قرارات حازمة بإزالة فورية لكل المخالفات في الشوارع العامة و الاسواق الرسمية و حتى التجار النظاميين مفترض يمنعوهم من عرض منتجاتهم قدام محلاتهم لانو ده تعدي على الشارع العام و تشويه للمنظر العام و إخلال بالسلامة العامة ، و لا المحليات منتظرين البرهان يجيهم في مؤتمر صحفي يديهم التعليمات عشان يطبقوا النظام الموجود اساسا في القانون .
بالمقابل كمان لازم تكون في حلول لاصحاب البضائع الغير نظاميين بتوفير اسواق و اكشاك و بسطات داخل المحليات بعد تسجيلهم و حصرهم و تصنيفهم و ده موضوع ما صعب و لا محتاج لميزانيات و لو سكتنا على الفوضى تاااااااااني معناها الخرطوم ح تتحول لاسواق دقلو ، و ح تنتشر الفوضى في كل مكان و ح ترجع شوارع و مواقف المواصلات بصورتها القديمة المشوهة كلها اكياس و بقايا اوساخ الباعة و الفريشة و ح يرجعو ستات الشاي يقعلو طوب الارصفة عشان يعملوهو ضرا للكوانيين ، خلونا نختار بين اتنين يا جماعة ، يا إما عاصمة حضارية ناهضة او بازار مفتوح للكل برعاية الفوضى و المحليات .
نزار العقيلي
مرحلة جديدة من الصراع السياسي المفتوح والحسم مؤجل