حسام حسن: "قدمنا أداء جيد في أمم أفريقيا رغم تشاؤم الجمهور"

أبدى حسام حسن المدير الفني لمنتخب مصر رضاه عن الأداء الذي ظهر عليه منتخب مصر في بطولة كأس الأمم الأفريقية، والتي حصل فيها الفراعنة على المركز الرابع.

وقال حسام حسن في تصريحاته خلال المؤتمر الصحفي: " أمم أفريقيا كانت أصعب نسخة من البطولة، فيه إمكانيات كبيرة وملاعب وتجهيزات والمنتخبات الأفريقية وصلت لأعلى مستوى وأعلى محترفين في أوروبا، وبالتالي كانت صعبة جدًا ".

وأضاف: " قدمنا أداء جيد في أمم إفريقيا رغم تشاؤم ناس كتير اننا بالعافية ممكن نتخطى دور المجموعات، لكن عدينا المجموعات بجدارة وأول المجموعة ووصلنا قبل الدولة المضيفة وقبل منتخبات عندها محترفين ".

هاني أبو ريدة يوجه رسالة لنجوم منتخب مصر والجهاز الفني محمود الشامي: الهجوم على منتخب مصر غير مبرر.. وهذا أقصى ما لدينا

وتابع: " المجموعة مكانتش سهلة، كان فيها لاعيبة مليانة محترفين زي زيمبابوي أو جنوب افريقيا او انجولا، في دور ال١٦ اصطدمنا بفريق بنين اللي كان منافس قوي في تصفيات كاس العالم والمباراة مكانتش سهلة، وتأهلنا لربع النهائي وكان ماتش صعب واللاعيبة قدموا مستوى رائع ".

وواصل: " مباراة جنوب أفريقيا كانت صعبة جدًا خاصة بعد الطرد لكن اللاعب المصري عنده القدرة يعدي أصعب محطات وبالطريقة اللي بنشتغل بيها قدرنا نكسب، وصلنا نصف نهائي على حساب كوت ديفوار بطل النسخة الأخيرة، وظهرنا بشكل يرضي الجماهير المصرية ".

واستطرد: " قابلنا السنغال بظروف معينة وعوامل كتيرة، روحنا من بلد لبلد ودي حاجة طبيعية لكن اللي مكانش طبيعي فترة الراحة الزيادة اللي واخدها السنغال، مكانش عندنا مشاكل في وسائل النقل، لكن اليوم يفرق معانا كتير، ده اثر على بعض اللاعبين وكان عندنا اصابات اجهاد يخلي اللاعيبة محتاجة راحة ".

واختتم: " دايمًا بنتكلم في العدالة اللي تخلي الفرق زي بعض في فترات الراحة .. لكن وصولنا لنصف نهائي أمم أفريقيا رغم الفوارق بيننا وبين المنتخبات التانية يأكد ان اللاعب المصري عنده الروح يتخطى حاجات كتير جدًا ".

المصدر: بوابة الوفد