تصريحات نارية من أمير عزمي بعد مغادرة الزمالك: «سماسرة وعصافير وقلة أدب»

أطلق أمير عزمي مجاهد المدرب المساعد للسويسري كريستيان جروس في الجهاز الفني السابق للفريق الأول لكرة القدم بنادي الزمالك تصريحات نارية، بعد قرار مجلس إدارة القلعة البيضاء برحيل الجهاز.

وقال أمير عزمي مجاهد مساعد جروس السابق عبر برنامج "الكورة مع فايق": "اللي اتقال على جروس من تشكيك في صحته وإنه بينسى قلة أدب وتربية".

وأضاف: "الكلام ده طلع من لجان ومن ناس جوه النادي ومن وكلاء لاعيبة والناس دي هتتكشف في يوم من الأيام وأنا عندي القدرة أقلع الناس دي هدومها بس مش هقول أسماء دلوقتي".

وأكمل أمير عزمي: "في ناس من الجهاز الفني بيطلع للإدارة ويقولوا كلام عليه وجروس عارفهم بالأسماء.. والراجل محترم مش فاضي للمستوى المنحط".

وواصل: "في ناس في الجهاز سبب في رحيله وكلموا لاعيبة قبل ماتش فاركو قالولهم إن الراجل ماشي وبعد الماتش قفلت الباب وقولتله حصل كذا قالي مش مهتم".

وأردف: "ناس في إدارة الزمالك مكانوش عايزني علشان أنا مش بتاع أحمر وأخضر وأصفر.. وجروس كان طلب عودة أوباما ومحمود علاء من ضمن الصفقات المطلوبة".

وعن حدوث أزمة بين شيكابالا وجروس، قال: "اللي حصل أن شيكابالا كان مضايق بعد مباراة انيمبا وكان بيتكلم في اوضه اللبس وأنا يومها خدت جروس وروحت المؤتمر الصحفي علشان ميسمعشي حاجه".

وأضاف: "جروس ثاني يوم عرف من حد معاه في الجهاز نقله القصه وراح قال لشيكابالا في التمرين بهدوء أنت كابتن الفريق ولو في مشكله في اوضه اللبس حلها".

وأتم: "جروس طلباته لم تنفذ ولم يتم تقديم شىء له والإدارة قامت بضم صفقتين فقط وطلب لاعبين لم يتم التعاقد معهم وهم الفرنسي إيلي يوان والمدافع المغربي محمد الجديدي وعودة أوباما ومحمود علاء، ومن يرسل الزمالك إلى خبر كان هم السماسرة، وبالتحديد سمسار واحد مش عارف ماسك أيه على النادي".

المصدر: الأسبوع