مصطفى بكري ينفعل على الهواء لهذا السبب (فيديو)

انفعل الإعلامي مصطفى بكري، بسبب محاولة بعض الأطراف إثارة الفتن داخل المجتمع المصري على مدار الأيام الماضية.

وقال "بكري" خلال تقديم برنامجه "حقائق وأسرار" المذاع على فضائية "صدى البلد" مساء الخميس، "هو في ايه، لا بجد  في ايه.. ايه الحكاية بالظبط، مين اللي بيشعلل الدنيا في البلد، في وقت إحنا في أشد الحاجة أننا نقف كتله واحدة خلف دولتنا وخلف رئيسنا".

وتابع "ليه إحنا سايبين الدنيا كده، وليه مطمنين قوي، قبل كده النظام اطمن قبل 25 يناير، ورغم كل الندوات والتحذير من المخلصين محدش سمع الكلام".

ما قبل 25 يناير 

واستطرد "لدرجة أن اللواء حسن عبد الحميد رئيس قطاع مباحث أمن الدولة كتب مذكرة من 12 صفحة حذر فيها من 25 يناير، وطالب بشوية تغييرات تهدي الشارع لكن لما اتسأل الرئيس مبارك عن المذكرة دي أثناء محكمته قال: إنه ميعرفش حاجة عنها، تصوروا لو الرئيس كان قرأ المذكرة دي من رئيس واحد من أهم الأجهزة الأمنية المعلوماتية، أكيد كان حيراجع الموقف ويهدي مشاعر الناس".

وأردف "ولما قامت مظاهرات 25 يناير وبعض المسؤولين ومنهنم المشير طنطاوي، والسيد عمر سليمان رحمة الله عليهما وغيرهم نصحوا الرئيس مبارك بالإصلاح".

وتابع "كان هناك جماعة من المستفيدين بيقولوا للرئيس، متسمعش كلامهم يافندم، دول شوية عيال وحيمشوا يوم ولا اتنين"

حل الرئيس للأزمات 

وأردف "طبعا الرئيس السيسي مش معزول عن الشعب وبيعرف كل كبيرة وصغيرة، لكن أنا هنا بتكلم على طريقة العرض، ولما سيادته بيعرف اي حاجة ضد مصلحة الشعب، بيتدخل على الفور وآخرها مشكلة "بلبن" بعدما الناس الدنيا اسودت في وشهم، تدخل سيادته، واعاد الحق لأصحابه، وتم حل المشكلة مع وعد بتنفيذ كل الملاحظات، ليه الاسلوب ده لا يتم التعامل بيه من الحكومة، الرئيس كان عينه على الاستثمار وعلى الحق، هذه المسائل بتطفش المستثمرين".

وتساءل بكري " بس ياترى الريس فاضي لكل هذه المشاكل، كفاية اللي مستحمله ليل نهار، تحديات على كل الاتجاهات، ضغوط من بره وجوه، والله مهمة ميقومش بيها إلا الابطال، ربنا يكرمه ويوفقه".

المصدر: بوابة الفجر