«كلمنى قبل الحادثة بـ10 دقائق».. نجل محمد صبري يكشف كواليس المكالمة الأخيرة مع والده قبل الرحيل المفاجئ

كشف نجل الراحل محمد صبرى نجم الزمالك السابق، تفاصيل مكالمته الأخيرة مع والده قبل وفاته، الأسبوع الماضي، الأمر الذي تسبب في حالة من الصدمة بالوسط الكروي المصري.

وتوفى محمد صبري، صباح الجمعة الماضي، إثر حادث سير مؤلم بمنقطة التجمع الخامس، بعد اصطدام سيارته بمبنى تحت الإنشاء، قبل أن يفارق الحياة في الحال.

وقال آدم محمد صبري في تصريحات تليفزيونية مع الإعلامي مهيب عبد الهادي: «والدى سايب رجالة، وكان بيعلق على حاجات وبيقول الصح والغلط ايه، مكنش سايبنا نتعلم من نفسنا».

وتابع: «كان دايما يخلينا نعمل خير ونعمل الصح مع الناس، مش أى حاجة يعنى، عمره ما كان بيسيبنا لوحدنا، كان حد جدع وطيب، كان بيهزر معايا ويتكلم معايا فى مشاكله وكلامه وضغوطاته، حاجة متضايق منها، كان يجى يقولى عليها كان بيتعامل معايا على أساس إنى راجل مش عيل صغير، ومكنش فى حدود كبيرة بينا».

وواصل: «مكنش بيحبنى أعمل مشاكل مع حد، يوم ما مات وفكرة روح شوف والدك دى كانت حاجة صعبة أوى كان معايا والدتى وأخواتى وكان لازم أبقا متماسك ومقوى قلبى، كان الصبح يومها الساعة اتنين ونص كان نازل يودينى التمرين فى نادى السكة، ويومها مروحتش المدرسة، وهو فى العربية متكلمناش فى حاجة قالى أنه خارج بالليل وقالى شد حيلك فى التمرين».

واختتم: «كلمنى قبل الحادثة بحوالى 10 دقائق كلنا كنا خارجين مع صحابنا، وقالى أنه تعبان وهيروح للدكتور وكان أول مرة فى حياته يقول أنه هيروح للدكتور».

المصدر: الأسبوع