مدرب الاتحاد يهاجم التحكيم: اتظلمنا بشكل كبير أمام الأهلي .. ونستحق التعادل

فتح تامر مصطفى، المدير الفني لفريق الاتحاد السكندري، النار على التحكيم عقب خسارة فريقه أمام الأهلي بهدفين مقابل هدف، مؤكدًا أن "زعيم الثغر" تعرّض للظلم خلال اللقاء الذي أُقيم مساء اليوم على استاد القاهرة الدولي ضمن الجولة 11 من الدوري الممتاز.

تامر مصطفى: كنا الأفضل في الشوط الثاني أمام الأهلي رغم الخسارة

وقال تامر مصطفى في المؤتمر الصحفي عقب المباراة: "الأهلي نادي كبير ومحترم جدًا، وأنا مش حابب أدخل في تفاصيل كتير، لكن اللي حصل النهاردة ظلم، وإحنا اتظلمنا بشكل كبير في قرارات الحكم".

وأضاف: "التحكيم النهاردة كان له تأثير مباشر على النتيجة، وده مؤسف لأن اللعيبة تعبوا وقدّموا مباراة كبيرة، ومايستحقوش يخرجوا خسرانين بالشكل ده".

ورفض مدرب الاتحاد توضيح تفاصيل الحالات التحكيمية المثيرة، قائلًا: "مش عايز أتكلم أكتر من كده، لكن اللي شاف الماتش يعرف كويس إحنا بنتكلم على إيه".

وشدد مصطفى على أن فريقه كان يستحق التعادل على الأقل، موضحًا: "كنا الطرف الأفضل في الشوط التاني، وضغطنا على الأهلي، وكان عندنا أكتر من فرصة خطيرة، لكن التحكيم ساهم في تغيير مسار اللقاء".

وختم حديثه قائلًا: "أنا بحترم الأهلي جدًا، لكن لازم يكون في عدالة داخل الملعب. التحكيم جزء من اللعبة، لكن لما الأخطاء تتكرر، لازم يكون في وقفة. جمهور الاتحاد عنده حق يزعل، لأن الفريق قدّم كل حاجة باستثناء النتيجة".

المصدر: بوابة الوفد