أحمد زكي يكتب: الكتاب لسه له مكان

أحمديات 
مازالت الكلمة حائرة بين مفهوم لم يقصد ومقصود لم يفهم فإجعل كلمتك بسيطة حتى يفهم مقصدها.
          زيارتي اليوم إلى معرض الكتاب
                  الكتاب لسه له مكان
«من يتوقف عن القراءة ساعة… يتأخر قرونًا»
الشعار ده  عنوان معرض القاهرة الدولي للكتاب السنة دي، وفعلًا حسيت بيه طول اليوم أثناء زيارتي.

وسط الزحمة والسرعة والموبايلات، المعرض بيأكد إن الكتاب لسه موجود، ولسه ليه مكان في حياتنا.اليوم كان رائع… دخلت المعرض وشفت كتب في كل اتجاه، وناس من كل الأعمار موجودة: أطفال فرحانين بأول كتاب، شباب بيدوّروا على حاجة تزود معرفتهم، وكبار بيجددوا علاقتهم بالقراءة. وده كله كان واضح أكتر أثناء جولتي بين الأجنحة المختلفة، لما قابلت شخصيات عامة محترمة: مفكرين ومبدعين بيكلموك من القلب عن تجاربهم وأفكارهم، ورجال دين شاركوا نصائحهم وحواراتهم بطريقة بسيطة وواقعية، ورجال دولة كانوا موجودين لدعم الثقافة والمعرفة المصريين روحهم جميلة جدًا وبيحبوا يتجمعوا، وده كان واضح جدًا في المعرض. الأعداد كانت كبيرة والجو كله فرحة وحياة… عائلات، أسر، أبناء، شباب، رحلات مدرسية، وحتى وفود من دول مختلفة. وكانت الزيارة فرصة حقيقية للقاء ثقافات مختلفة، مع ندوات فكرية وعقلية، وأماكن للنقاش والحوار. كل لحظة فيها كانت بمثابة غذاء للروح، وبصراحة حسيت إنها تجربة غنية بالمتعة والفائدة.
وسط دوشة الحياة، المعرض بيديك فرصة تهدى شوية. تمسك كتاب، تقلّب صفحاته على مهلك، وتختار اللي شبهك… بعيد عن الشاشة والسرعة اللي واخدة كل حاجة تقريبًا. وفي الآخر، ممكن تمشي من معرض القاهرة الدولي للكتاب بشنطة مليانة كتب، أو حتى بكتاب واحد بس… لكن الأكيد إنك بتخرج بإحساس مختلف، وإيمان بسيط وواضح: مهما الزمن اتغير، ومهما الدنيا جريت… الكتاب لسه له مكان.
               تحياتى ومن عندياتى،،،

*قرمشة:
   بسم الله الرحمن الرحيم
"اقْرَأْ بِاسْمِ رَبِّكَ الَّذِي خَلَقَ"
 صدق الله العظيم        (سورة العلق، الآية 1).
هذه الآية الكريمة هي أول ما نزل من القرآن الكريم على النبي محمد ﷺ في غار حراء، وهي دعوة إلهية للعلم، والقراءة، والتدبر في ملكوت الله.
                     إلى اللقاء،،،

المصدر: بوابة الفجر