عاش كل قائد جعفري

28 فبراير، 2024

بغداد/المسلة الحدث:

محمد المحاويلي باللهجة الدارجة..

قبل اكثر من ثلاثين سنة علمونا في كلية العلوم السياسية أن دول العالم اللي بيها حظ (اللي نسميها احنه بالعراق الدول الكاااااافرة)، تحرص على ان لا يظهر شخص واحد من بين ابناء شعبها يقف بالضد منها، ماكو مشكلة ينتقدها يعارض بعض توجهاتها، ولكن ان يأمل ويتمنى سقوط نظامها القائم وتغيير العملية السياسية بيها لا، لذلك تگطّع روحها هاي الدول وتنفق اموال طائلة وتبذل جهود وحراك واسع حتى لا يصير هذا الشخص اثنين ثم عشرة ثم الف وهكذا يتصاعد العدد فيشكل خطورة على استقرار البلد، وربما يصبح الشخص ظاهرة تضم مئات الالاف او ملايين قد تزعج النظام.

. هذا تفكير الدول الكااافرة، اما دول الغمان دول الايمان والتقوى والأخلاق والنزاهة والشرف والعفاف والشفافية فإنها تستقتل حتى تفرخ ناس يكونون ضدها، معتقدين بالقول البائس شنو الضرر او اهمية واحد او عشرة او مية او الف او عشرة الاف أو اكثر من يكونون ضد العملية السياسية!!! بهاي الدول الفهيمة (طبعاً العراق ابد مو من ضمنها) يهدون بالمجاني ناس حتى يوكفون ضدها، حتى اللي ماشي مع توجهاتها تروح تصر على ان يكون ضدها، ومو مشكلة سواء كان صحفي او عالم او حامل شهادات عليا او كفاءة بالمجتمع… (شنو يعني شيريد يسوي خل يسوي قابل يعصي علينه) وداعتكم هيج تفكر دول الغمان مثل ما وصفها السيد عزة الشابندر…

وأخيراً تدرون يمته الناس تحب السلطة؟؟؟.. السلطة مثل الأب ومثل المربي ومثل المعلم لازم الإبن يحبها حتى من تعاقبه لأن عنده احساس مو قصدها تستهدفه، ولازم السلطة تتلوى من الوجع من تحاسب واحد من افراد شعبها مو تتلذذ بأذيته وتتباهى بتسقيطه والتشهير بسمعته.. بهذاك الوكت يظل يحبها ويدافع عنها… اما اذا هو بالاصل معها ودفع دمه لأجل بلده ودم اخوته واهله وتجي السلطة تستهدفه وتحاربه وتأذيه.. ممكن تگلولي شلون راح يحبها او يدافع عنها او يحرص على بقاءها.. اكرر بأن الموضوع ماله علاقة بالعراق وانما عموميات.. وعاش العراق وعاش كل قائد جعفري وماكو ولي الا علي ونريد قائد جعفري.

المسلة – متابعة – وكالات

النص الذي يتضمن اسم الكاتب او الجهة او الوكالة، لا يعبّر بالضرورة عن وجهة نظر المسلة، والمصدر هو المسؤول عن المحتوى. ومسؤولية المسلة هو في نقل الأخبار بحيادية، والدفاع عن حرية الرأي بأعلى مستوياتها.

المصدر: المسلة