لماذا ياسر العطا في بداية الحرب كذب علينا وقال لينا كلها اسبوع اسبوعين والجيش يحسم المليشيا

(إسبوع إسبوعين)
الفريق اول ياسر العطا في بداية الحرب كذب علينا وقال لينا كلها اسبوع اسبوعين والجيش يحسم المليشيا ، وانت يا نزار اخير منك ياسر العطا لانو قلت لينا كلها تلاتة ايام وتاني قلت لينا خلال شهر .
دي كلها انتقادات منتشرة من الاسابيع الاولى للحرب و روجو ليها القحاطة بقوة ، و قبل ما ندخل على الموضوع جهز كباية قهوتك و تعال .

في البداية لازم نعرف إنو اي جندي خاض معارك حربية بيكون عارف تماما إنو معركة الجيش مع مليشيا آل دقلو من المستحيل تتحسم بانتصار في اسبوعين او حتى شهرين فما بالكم بقادة الجيش ، يعني بالله عليكم في قيادة جيش في العالم ده ممكن تدخل معركة وتقول لشعبها و للعالم انو المعركة ح تطول ؟ لو قالو كده ما كان ح يكون في فرق بينهم و بين نشطاء قحت ، و عشان ما اطول عليكم ح نمشي نشوف لييييه قادة الجيش و الداعمين للجيش كانو بيطمنوا الناس بانو المعركة ح يتم حسمها سريعا .

اولا يا عزيزي ، رسائل الطمأنينة دي بتندرج تحت سلاح الحرب النفسية وسلاح الحرب النفسية من اهم و اخطر انواع الاسلحة والاهداف البتحققها الرسائل في اطار الحرب النفسية هي رفع الروح المعنوية للقوات في المقام الاول و طمأنة الشعب لاحتواء حالة الهلع الممكن تتسبب في إنهيار اقتصادي و اجتماعي كبير بسبب الشعور بانو الحرب ما ح تنتهي قريب و كمان من اهداف رسالة الطمأنينة اضعاف الروح المعنوية للعدو .

ما كده بس ، دائما الدول البكون الوضع السياسي فيها متدهور و بتعاني من انفلاتات امنية لازم يطهروا قادتها بانهم مسيطرين و قادرين انو يحسم الحرب سريع و بيعملو كده عشان يحققوا اهداف كتيرة على راسها المحافظة على ثقة الشعب في قواته المسلحة و المحافظة على دعم الاصدقاء الاقليمين و الدوليين ، يعني معقولة في قائد جيش عاقل بيطلع يقول انو الحرب ح تكون طويلة عشان يخسر حلفاءه الاقليميين و الدوليين ؟؟

كمان في هدف مهم جدا و هو المحافظة على تماسك و وحدة الجيش من خطر الانقسامات خاصة انو جيشنا جيش قومي فيهو خليط قبلي و مناطقي كبير جدا .

اساسا من مبادئ العسكرية انو الخطط و المعلومات الحقيقية ما ممكن تملكها للعامة و خاصة في بداية الحرب ، ما ممكن تطلع تقول انو الحرب ح تستمر لمدة سنة او سنتين ، كده انت بتكشف انو عندك نقاط ضعف كبيرة و بتشجع العدو انو يستثمر اعلاميا و سياسيا في تصريحاتك .

يعني تفتكروا لامن التحالف السعودي الامارتي دخل في حرب اليمن ما كان عارف انو حرب اليمن ح تستمر لفترة طويلة ؟ لكن كان الشعار البارز للتحالف هو الحسم السريع ، و هل تفتكروا انو امريكا في غزو العراق او افغانستان ما كانت عارف انو الحرب ح تطول ؟ كانوا عارفين لكن كل تصريحات قادة الجيش الامريكي كانت بتاكد انو المعركة ح تكون حاسمة و سريعة ، كذلك الدب الروسي لامن دخل اوكرانيا كان بيطمن شعبو بان المعركة ح تكون سريعة و حاسمة .

يلا لامن ناشط او سياسي يقول ليك ياسر العطا قال اسبوع اسبوعين تقوم قبل ما يكمل كلامو تقطع فيهو كف صاموطي ، لانو النوع ده راسو فاضي و يا ريت اخونا مزمل ابو القاسم يكتفي بنشر الاخبار و يرجع يركز في الرياضة بدل ما يوجع بطنا مع القحاطة في شاشات الجزيرة ، لقاءات نشطاء القحاطة على شاشات الجزيرة رسلو ليهم الصعاليك ناس حسن اسماعيل و الشواني .

نزار العقيلي

إنضم لقناة النيلين على واتساب

المصدر: موقع النيلين